Kakefest for 20-millionarskontrakt i Herheimsdalen

Innføringa av ein ny damforskrift i 2010 gjer at ei rekke norske damanlegg må oppgraderast, mellom anna for å handtera stadig aukande nedbørsmengder. I saudafjella er både Svartevassdammen og Finnflotdammen sett i stand i tråd med den nye forskrifta. Til sommaren står dammen ved Fetavatnet i Herheimsdalen for tur.

Måndag signerte prosjektleiar Torgeir Oma Tveiten i Brødrene Selvik AS og Saudefaldene-direktør Svein Ilstad kontrakten som stadfestar at det lokale entreprenørfirmaet har fått oppdraget med å bygga den nye dammen.

Verd rundt 20 millionar

Ifølge prosjektsjef hos Saudefaldene, Siri Ramsnes, var fire tilbydarar med og konkurrerte om oppdraget, som har ein samla verdi på om lag 20 millionar kroner.

– Saudefaldene og Brødrene Selvik har hatt fleire prosjekt saman tidlegare. Me gler oss til å samarbeida med dei også om dette prosjektet, slo Ramsnes fast.

Eitt av dei tidlegare samarbeida, opprustinga av Dam Finnflot i 2017-18, blei heidra med utmerkinga Damkrona».

Entreprenøren har leigd inn ekstern kompetanse for å sikra at plastringa», den tekniske utføringa av damarbeidet, skjer etter boka.

Brødrene Selvik AS har i 2022 hatt i oppdrag å oppgradera dam Hattaløfttjørna like ved Fetavatnet.

– Styra i Orkla og Sunnhordland Kraftlag som var på synfaring i sommar, fekk eit svært godt inntrykk av arbeidet til entreprenøren, legg direktør i AS Saudefaldene, Svein Ilstad, til.

Han er svært glad for at det var eit lokalt firma som gjekk sigrande ut av den tette anbodskonkurransen.

– Dei har ikkje fått nokon fordeler av å vera lokale, me følger boka i slike prosessar, slår Ilstad fast.

Stor jobb

– Me er svært fornøgde med at me har kome til bordet her og gler oss til å gå i gang med oppdraget til våren, slår Brødrene Selvik sin prosjektleiar Torgeir Oma Tveiten fast.

Me snakkar om ein relativt stor jobb her?

– Ja, dette er ein kjempejobb, seier Tveiten, og får støtte frå kollegaene Leif Kåre Søndenå og Tommy Ramsnes, som er med på signeringsmøtet.

– Kor mange tilsette vil ha Herheimsdalen som arbeidsplass neste sommar?

– Det blir ein veldig intensiv periode, i alle fall med betongarbeidet, men på det meste er me nok åtte-ti personar, trur Tveiten.

– Ti-tolv, meiner kollega Ramsnes.

Dette vil på det mest omfattande utgjera mellom halvparten og ein tredel av dei tilsette i entreprenørfirmaet.

Dersom ikkje snøen blir liggande for lenge utover våren, reknar både oppdragsgivar og entreprenør med at jobben kan fullførast i løpet av ein sommar.

Den nye dammen i Fetavatnet vil bli tre meter høgare enn dagens dam. Endringa får ikkje konsekvensar for reguleringshøgda i vatnet.

Trur på vegløysing

Innleiga av plastringskompetanse vil også gi Brødrene Selvik høve til sjølv å læra meir om damplastring, som det blir stilt strenge krav til frå NVE si side. Ny kompetanse kan gi konkurransefortrinn ved seinare prosjekt.

– Når Dam Fetavatnet er fullført, startar me prosessen fram mot ei tilsvarande oppgradering av Helgedalsdammen, fortel direktør Ilstad.

– Kva med vegen forbi Fiveland? Det ligg an til å bli mykje tungtransport gjennom tuna der til sommaren?

– Eg håpar og trur på ei løysing på vegsaka på Fiveland, avrundar Saudefaldene-direktøren.