Karmøy Lufthavn i pengetrøbbel ønsker å låne pengar av Sauda kommune

Dei økonomiske problema til lufthamna på Karmøy har pågått over tid. Regionrådet oppfordrar nå kommunane på Haugalandet om å låne Karmøy Lufthamn Invest AS til saman 20 millionar kroner, for at selskapet skal få eit finansielt handlingsrom til å finne ei bærekraftig drift. I tillegg er det planlagt å hente inn med 15 millionar kroner i ein emisjon med eksisterande eigarar.

Det er koronapandemien som har sett lufthamna på Karmøy i ein vanskeleg økonomisk situasjon. Regionrådet meiner det er i kommunane på Haugalandet si interesse at det er ei lufthamn på Haugalandet. Det er derfor foreslått å låne selskapet 20 millionar kroner, der beløpet blir fordelt på kvar kommune etter innbyggartal. For Sauda sin del utgjer dette 759 000 kroner.

Ja, under tvil

Kommunedirektør i Sauda, Vegard Thise, meiner det er i ein viss interesse for innbyggarane i Sauda å sikre fortsatt drift ved Karmøy Lufthavn. Samtidig ser han på lånet som ein betydeleg risiko og at det ikkje er sikkert at Sauda kommune får tilbake desse pengane.

Under tvil meiner kommunedirektøren at det er riktig av politikarane i Sauda å følge oppfordringa frå Regionrådet om å delta i finansieringa. Kommunedirektøren er likevel uroa over at drifta av lufthamna fleire gonger har måtte få bidrag frå offentlege aktørar.

– Det som tilslutt gjer at kommunedirektøren landar på ein positiv innstilling er at både regionen og Sauda står ovanfor store næringsinitiativ i tida framover, og at det vil kunne vere viktig å sikre at ein kan køyre fergefritt fra lufthamn til Sauda. Kommunedirektøren legg også vekt på at det er viktig å styrke det regionale samarbeidet, og då må også Sauda vere med på dei felles løfta, skrive kommunedirektør Thise i si innstilling til formannskapet, som skal ha møte onsdag.

Saka skal deretter til kommunestyret.