Kjøper Varicon og satsar på Sauda
PDS Protek AS har inngått avtale om kjøp av Varicon AS og satsar på å bygge opp ei eiga avdeling i Sauda.
Saudabedrifta Varicon bygde seg opp over fleire år til å bli ei kompetansebedrift med fleire tilsette som dekka fleire fagområde. Men under koronapandemien fekk bedrifta utfordringar. I det siste har dagleg leiar Stian Johnsen Nordvik drifta Varicon aleine. Han arbeider med landmåling, scanning og bruk av droner. Nå blir Nordvik og Varicon ein del av PDS Protek.
Han opplyser at Varicon og PDS Protek fram til nå har kjøpt tenester av kvarandre og har samanfallande interesser. Med eit større fagmiljø i ryggen ser Nordvik fram til å bygge opp ei saudaavdeling, og ikkje minst få litt fleire kollegaer rundt seg.
Annonse
– Det skjer mykje i Sauda
Administrerande direktør i PDS Protek, Geir Ivar Seime, opplyser til Ryfylke at PDS Protek har vore til stades i Sauda over fleire år.
– Det skjer mykje i Sauda og det vil skje mykje i Sauda framover. Eramet og fleire andre bedrifter har investeringsplanar og prosjekt på gang.
Trine Halsnes, som er avdelingsleiar i PDS Protek opplyser at dei er i dialog med fleire utflytta saudabuar som vurderer å flytte tilbake til Sauda. Ingeniørutdanna Simen Lillehammer, som er saudabu, har nettopp blitt tilsett i saudaavdelinga.
Annonse
– Kjekt å tilføre arbeidsplassar
– PDS Protek er ei ingeniørbedrift. Det er fleire saudabuar som har ingeniørutdanna seg og som vurderer å flytte tilbake til Sauda. Det er sterke søkarar. Det er kjekt å kunne tilføre arbeidsplassar til Sauda. Me har ettertrakta jobbar å tilby, seier Trine Halsnes, som sjølv har vakse opp i Sauda.
Ho utelukkar ikkje at ho sjølv ein dag tar med familien og flyttar tilbake Sauda.
Halsnes håper at dei etter kvart kan bygge opp ei solid avdeling i Sauda, og at det uansett er enkelt å bruke ressursene på tvers mellom Sauda og Haugesund i dagens digitale samfunn.
150 tilsette i PDS Gruppen
– PDS Protek har som ingeniørbedrift spisskompetanse innan design, analyse og detaljprosjektering, og blei etablert for over 30 år sidan. Me har satsa stort på programvarer og verktøy. Me har mange kundar og er involvert i eit stort spekter av ulike prosjekt på land og til havs, seier Halsnes.
Annonse
Ho opplyser at dei nå er godt i gang med det grøne skiftet og berekraftarbeidet.
– Dette ser me er framtida. Om ein skal få vere ein leverandør framover, så må dette på plass! Me ønsker å vere ein attraktiv servicebransje og tiltrekke oss innovativ industri, seier Trine Halsnes.
PDS Protek, med sine 20 tilsette, er ein del av PDS Gruppen, som totalt har cirka 150 tilsette og har ei omsetting på omlag 200 millionar kroner.
Kjell Erik Kleveland, som også har vakse opp i Sauda og er seniorprosjektleiar for PDS Protek, opplyser at han byttar på å jobbe i Haugesund og Sauda, der han jobbar på eit Eramet-prosjekt.
– Me held til i administrasjonbygget til Eramet. Det har med tilgjengelegheit til Eramet å gjere, seier Halsnes.
– Men me har ikkje bare Eramet som kundar i Sauda, presiserer Stian Johnsen Nordvik.
