Kraft Kafe avviklar drifta ved utgangen av året

Måndag denne veka opplyser Kraft Kafe at dei har sagt opp driftsavtalen med Sauda kommune og avviklar drifta i lokala til Kulturhuset Folkets Hus Sauda.

– Me har ikkje nok kundar og drifta går ikkje rundt økonomisk. Eg kan ikkje lenger finansiere drifta av private midlar. Me avsluttar drifta 31. desember, men fram til det vil me drive som normalt, opplyser dagleg leiar Nicholas Guindani.

Gjennom sitt selskap Ryfylke Mat inngjekk Guindani i 2018 avtale med Sauda kommune om å drive kafe i det nye kulturhuset i Sauda. Til å begynne var det vanskar med å få drifta til å gå rundt økonomisk sjølv om det var ein del kundar. Etter å ha fått tilpassa driftavtalen med Sauda kommune, begynte drifta å gå rundt, før dei og alle andre serveringsstader blei hardt ramma av pandemien og restriksjonar. Pandemien blei erstatta med høge straumprisar og nye utfordringar.

– Det er sikkert fleire faktorar som spelar inn, men me var uheldige med timingen, seier Guindani.

Han opplyser at sommardrifta dei siste par åra har vore bra.

– Men ikkje drifta om vinteren. Sommardrifta klarer ikkje å finansiere resten av året. Eg kan ikkje drive dugnad. Eg må tenke business, seier Guindani.

Han opplyser at det er tre fast tilsette i Kraft Kafe som etter nyttår er utan arbeid.

– I tillegg rammar det ein haug tilkallingsvikarer og sommarvikarer, seier han.

Han veit heller ikkje kva han skal gjere etter nyttår. Guindani sa opp fast jobb i Nordsjøen for å drive Kraft Kafe.

Guindani opplyser at alle bestillingar og arrangement ut året vil gå som normalt.

– Det er også gjort bestillingar for neste år. Eg vil ta kontakt med dei som har bestilt neste år for å sjå om det finst ei løysing. Lokala står her og eg er forsatt kokk, seier Nicholas Guindani.

Han opplyser at Ryfylke Mat avslutta kjøttproduksjonen for eitt par år sidan, slik at selskapet kun har drifta Kraft Kafe dei siste to åra.

Det er gjennom avtale med Sauda kommune Ryfylke Mat har hatt driftsavtale i kulturhuslokala.

Nicholas Guindani presiserer at Sauda kommune har gjort det dei kan for at drifta av Kraft Kafe skulle gå rundt.

– Eg har ingenting å utsette på Sauda kommune. Det har ikkje noko med det å gjere. Det har med kundemassen å gjere, spesielt i vinterhalvåret, seier Nicholas Guindani.