Lærar Gro Høiland fekk ”parkeringsbot” på jobb: – Dette var ei veldig kjekk bot å få

– Først skjønte eg ikkje så mykje. Eg har aldri fått bot før, så eg visste ikkje heilt kva eg skulle tru. Men eg såg at det var fleire av dei andre bilane som også hadde fått slike gule lappar i frontruta, fortel Gro Høiland.

Ho er lærar for sjette klasse ved Austarheim skule, og skulle køyre heim frå jobb då ho fann lappen på bilen sin.

– Då eg leste kva det sto på lappen, måtte eg smile. Der sto det ”Parkeringsbot!! Du har fått parkeringsbot fordi du har parkert fint. Frå 7. klasse. Ha ein fin dag”. Vi har ein regel om at vi skal parkere bilane med fronten ut, og det pleier eg å hugse. Dette var ei veldig kjekk bot å få av elevane ved skulen, smilar ho.

Fleire bøter

Lilly Lucas (12) og Anette Nilsen Solbrekk (12) er begge elevar i sjuande klasse ved Austarheim skule. Dei er to av elevane som står bak dei spesielle ”parkeringsbøtene”, og dei fortel at lappane har eit heilt klart formål, nemleg å skape glede. Fleire andre bilar hadde fått liknande lappar, og beskjedane var forkjellige.

– Vi la ei parkeringsbot på ein gymlærar sin bil, og på den ”bota” sto det at han er ein kjempegod lærar, og at han er flink til å lytte på oss elevar. Vi håper at alle som fekk parkeringsbøter, blei glade for det som stod på dei. Då har vi klart det vi prøvde på, nemleg å skape litt glede, forklarer dei to jentene.

Å gi seg sjølv skryt

Kvifor har sjuande trinn ved Austarheim skule skrive ”parkeringsbøter” med hyggelege meldingar til vaksne på skulen? Jo, heile formålet er å glede andre. Som fleire andre skular er Austarheim ein såkalla ”gledingskule”. Dette er eit landsomfattande tiltak som har som mål å hjelpe skular å løfte fram sunne haldningar og gi elevar erfaring og bevisstheit rundt tema som meistring, feiling, sjølvkjensle, empati og gleding av både seg sjølv og andre. Dei oppmuntrande parkeringsbøtene var ein del av 7. klasse sitt arbeid med dette prosjektet.

– Å vere ein gledingskule har gitt oss mykje bra, synest eg. Ein av tinga eg har lært mykje om, er det å tørre å gi seg sjølv skryt når ein får noko til, og å tørre å seie sånt foran klassen, fortel Anette.

Lærar Gro Høiland legg til at det er mange gode tema innan gleding-prosjektet, og at tema blir endra kvar månad.

– Dette er litt nytt for oss, så vi jobbar med å få dette naturleg inn i undervisninga. Elevane verker interesserte og engasjerte, og dei er heilt med på målet om å glede både seg sjølv og andre, og spesielt det som går på sjølvkjensle og det å tørre å gi seg sjølv skryt, seier ho til slutt.