– Leiar-kabalen er ennå ikkje løyst

Selskapet WÅ Invest AS er deleigd mellom brørne Alf Jostein Årtun og John Henry Wormstrand Årtun. Selskapet kjøper no saudaselskapet HS Maskin AS som er heileigd av Karl Ingebrigt Hetleflåt sitt holdingselskap.

– Det stemmer at vi har kjøpt HS Maskin. Eg starta sjølv der som lærling rundt 1994, og kjenner selskapet godt. Vi trur at både AS Forskaling og HS Maskin vil ha positivt utbytte av kvarandre, både med tanke på tilsette, leiarskap og økonomi. Men når det gjeld drifta, skal ikkje HS Maskin gjennom noko store endringar som følge av dette oppkjøpet, seier dagleg leiar i WÅ Invest og AS Forskaling, Alf Jostein Årtun.

– Som før

HS Maskin har hatt ei positiv driftsutvikling sidan 2018, og omsette for over 20 millionar kroner både i 2020 og 2021. Selskapet, som har sitt anlegg på Nesøyra, har levert tenestar innan blant anna industri, maskin og sveis sidan 1984. Eigar Karl Ingebrigt Hetleflåt stadfestar oppkjøpet overfor Ryfylke, men understreker at alle formalitetar ennå ikkje er på plass. Han fortel at selskapa HS Handel og HS Transport ikkje kjem til å bli berørte.

– No har eg halde på med dette i 39 år, og tenker det må vere lov å gi seg. Eg skal pensjonere meg, og gler meg til meir tid til hus, hage og bubil. HS Maskin kjem til å halde fram som før, men med nytt eigarskap, seier han til Ryfylke.

Ingen leiar-løysing

HS Maskin har søkt etter ny dagleg leiar i omlag eitt år, utan at ei permanent løysing har kome på plass. Karl Ingebrigt Hetleflåt skildrar rekrutteringa til leiarjobben som ei utfordring.

– Nei, vi har rett og slett ikkje greidd å finne nokon som kan ta over den jobben. Eg kjenner ikkje til kva planar dei nye eigarane har rundt dette, seier han.

Noko klar plan har Årtun førebels ikkje.

– Det er ikkje planlagt, nei. Eg kjenner til at dette har vore ein vanskeleg jobb å finne rett person til, men eg trur at det kan ha ein viss effekt med ein større organisasjon. Kanskje vil det trekke til seg noko fleire søkarar. Vi får sjå, seier han.

Jante-lov

Alf Jostein Årtun seier han er spent på kva reaksjonar oppkjøpet vil få blant saudabuen. Vi spør han kvifor han har kjøpt HS Maskin, og får eit tydeleg svar.

– Det er fordi eg har tru på selskapet. Eg har tru på at vi kan drive vidare og ha gode arbeidsplassar for dei tilsette. Eg trur også at selskapet både vil ha godt av eit tett samarbeid med AS Forskaling. Det er heilt sikkert nokon som vil ta ”Jante-lova” i hand og ryste på hovudet, men eg meiner vi må ha nokon som tør å satse for at skapinga i Sauda kan halde fram, og vi kan utvikle oss. Då vil også desse som står med ”Jante-lova” i hand, ha jobbar å gå til i framtida, avsluttar Årtun.