– Litt ironisk at Sauda kommune i økonomisk uføre skal hjelpa næringslivet med pengar
Formannskapet vedtok regelverket for den nye, lokale straumstøtteordninga.
Onsdag denne veka stod saka Støtteordning til næringslivet» på saklista til formannskapet. Etter forslag frå Sp blei det, i budsjettet for 2023, lagt inn ti millionar kroner til ei økonomisk straumstøtteordning for næringslivet i Sauda. Nå har eit einstemmig formannskap godkjent regelverket for ordninga.
Men sjølv om politikarane var einige om at det både er viktig og kjekt å kunna hjelpa næringslivet i den utfordrande kraftpris-tida, gjorde fleire av dei vedtaket med ein liten bismak i munnen. Spesielt etter økonomisjef Roy Ove Kvernenes si orientering om Sauda kommune sine mange og uføreseielege økonomiske utfordringar i tida framover.
Annonse
– Ironisk
Sps Vegard Birkeland Rød sa at han følte det som ironisk at Sauda kommune, som sjølv har store økonomiske utfordringar, skal bruka ti millionar kroner på å hjelpa næringslivet.
– Eg kjenner litt på det at då me vedtok dei ti millionane hadde me heilt andre forventningar til inntektene våre i 2023. Nå styrer me mot eit underskot. Er det då lovleg å gjera dette, dela ut pengar til næringslivet? spurde han.
Ordførar Asbjørn Birkeland (Sp) svarte at 2023-budsjettet er vedtatt og at det ikkje er noko ulovleg med å ha ei slik støtteordning, sjølv om økonomien til kommunen nå har endra seg.
Annonse
– Hjelp til sjølvhjelp
Aps Hallgeir Amdal og KrFs Kristian Landro var einige i at den økonomiske situasjonen har endra seg, men meinte likevel at ein måtte stå fast på lovnaden om straumstøtte.
– Me må tenka langsiktig, for å bevara og støtta opp om det næringslivet me har. Dette er hjelp til sjølvhjelp, sa Amdal.
– Eg er einig med Amdal. Dette handlar om langsiktigheit. Her har ein brukt nærliggande kommunar som eksempel, og dette er noko me også bør gjera, nesten uavhengig kraftinntektene. Ti millionar er bare eit tenkt tal, det er ikkje sikkert alle blir brukt, minna han om.
Også Morten Maldal (Sp) meinte støtteordninga er viktig.
– Ei kjempesak. Ei viktig sak for bygda og næringslivet, sa han.
Annonse
I regelverket for ordninga er det blant anna reglar for kven som kan søka om støtte, for kva som krevst av dokumentasjon, korleis ein reknar ut støtta og kor ofte støtta blir utdelt. Bedrifter som får støtte i år kan ikkje ta ut utbytte i år.
