Barn oppfattar trafikk heilt forskjellig samanlikna med vaksne, og særleg dei minste har vanskeleg for å bedømme om ein bil står stille, eller om han er i rørsle.
NPK
Mange barn blir skadde i trafikken ved skulestart
I fjor vart 118 unge under 19 år skadde i trafikken i august. Det er nesten fire kvar dag, skriv Frende Forsikring i ei pressemelding.
Av dei 118 var 36 personar mellom 6 og 15 år. 55 var mellom 16 og 17 år.
– Det er ein klar samanheng mellom alder og talet på skadar. Jo eldre barna blir, jo oftare kjem dei seg åleine til skulen. Det er viktig at ungane veit korleis dei skal ferdast trygt på skulevegen så alle kjem seg til og frå utan uhell, seier fagsjef på motor i Frende Forsikring, Roger Ytre-Hauge
– Bilistane har openbert også eit stort ansvar dei neste vekene. Hugs på at det er fleire barn i trafikkbiletet enn det har vore gjennom sommarvekene. Ikkje forvent at dei små har kontroll og oversikt over trafikkbiletet på same måte som vaksne, seier Ytre-Hauge.
