− Me skal blø for drakta!

Laurdag set nær 40 unge fotballspelarar frå Sauda IL seg på bussen på veg til Oslo og Ekebergsletta, der Norway Cup går av stabelen igjen etter to års pause. Ryfylke fekk ein prat med tre av dei, ei god veke før avreisa til hovudstaden.

− Kva forventingar har de til osloturen og deltakinga i ei av verdas største fotballturneringar?

− At det blir veldig kjekt, at eg skårar nokre mål og… at det er noen pene damer der, seier Isak Helle Løvaas (14), som speler på G16-laget til Sauda IL.

− Har du vore på Norway Cup før?

− Nei, men eg har hatt veldig lyst, så dette blir kjekt, trur Isak.

Oda Bruknapp Skoglund gler seg også til å spela fotballturnering i Oslo, og til å vera på tur og finna på kjekke ting saman med lagvenninnene på J15-16-laget til Sauda.

− Eg trur òg det blir ein kjekk tur. Og så håpar eg me vinn nokre kampar, seier Oda.

Laget hennar er meldt på turneringa i sjuarfotball – og troppen som reiser austover tel akkurat sju spelarar.

− Ingen innbyttarar?

− Det er ikkje så lange kampar, så det trur eg skal gå fint, meiner Oda.

Ikkje på flatseng

Til liks med Isak og Oda skal også Kasper Birkeland Knutsen (13) vera med på sin første Norway Cup– og gler seg til turen.

− Eg forventar at dette skal bli gøy, at me får gode dommarar som dømmer rett, at me vinn kampar og at me får god mat!

− God mat? Det er vel ikkje det slike store turneringar er mest kjend for?

− Me skal bu på hotell, me, skyt Isak inn, og får støtte av dei to andre.

− Hotellfrukost, forklarer han vidare.

− Det var det eg meinte med god mat, kjem det forklarande frå Kasper.

Sjølv om turen i seg sjølv er eit mål, har saudagjengen planar om å bita godt frå seg på fotballbanen.

− Me skal blø for drakta, slår dei tre fast.

− Som ein stor ferie

Reisa til hovudstaden går med buss for dei aller fleste av spelarane og støtteapparatet.

− Det blir kjekt, det. Alle i lag, seier Isak, vel vitande om at vegen over fjellet mot Røldal lett kan gjera bussfolket bilsjuke.

− Hotellet me skal bu på ligg nær Storo-senteret. Det blir shopping der, slår Oda fast.

Gutane er ikkje like entusisastiske til akkurat det…

− Me skal på Tusenfryd, opplyser Isak.

− Og Frognerbadet, legg Kasper til.

− Det er eigentleg bare som ein stor ferie… meiner Isak

− …med nokre kampar innimellom, utfyller Oda.

Opphaldet i Oslo varer i ei veke, frå laurdag til laurdag.

− Eg forstår de gler dykk…?

− Eg har gledd meg sidan februar, då me fekk vita at me skulle til Norway Cup, fortel Isak.

Har jobba dugnad – og betalt litt

− Det kostar jo litt å reisa til Oslo og bu på hotell. Korleis har de skaffa pengar til dette?

− Me har selt lodd, forklarer Isak.

− Og me har selt dopapir, lodd og saft og sånn, seier Oda.

− Dopapir, lodd og selt mat, kjem det frå Kasper.

− Og pant, opplyser Isak.

− Men dette har de sjølv gjort, ikkje foreldra dykkar?

− Jaaa! kjem det frå alle tre.

− Og så har pappa betalt litt og då, fordi han er så snill, seier Isak.

Om dei ikkje har vore med på Norway Cup sjølv, har trekløveret snakka med andre som har deltatt i fotballfesten på Ekebergsletta. Det har ikkje akkurat dempa forventningane til dei tre.

− Me har store forventningar, slår Isak, Oda og Kasper fast.

Startar søndag

G13-laget innleiar gruppespelet mot Oslo-laget Veitvet søndag ettermiddag, med kampar mot Hareid frå Sunnmøre og Øvrevoll/Hosle frå Bærum dei påfølgande dagane.

J15-16 møter først Malvik frå Trøndelag søndag, etterfølgt av Høydalsmo frå Telemark og Tromsø-laget Skånland.

G16 skal sist i elden av saudalaga søndag, med Eid IL frå Nordfjordeid som motstandar. Etter dette ventar Blindheim frå Ålesund måndag kveld og Halden-laget Tistedalen sitt toarlag tysdag.

− Eg har trua på jentene. Dei kjem lengst av saudalaga, spår Isak.