Nå blir det sykkelfest i Sauda

– Dette gler me oss til! Me er utruleg glade for at søknaden vår er innvilga og at me når står på turnélista, seier Thomas Wahl, leiar i Sauda sykkelklubb.

Lang turnéliste

Tour of Norway for kids, Norges største sykkelritt for ungar, har nyleg presentert turnelista si for 2022. Frå 1. mai til 28. august skal arrangementet innom heile 40 små og store byar og bygder i Norge. Det heile startar 1. mai på Lillestrøm, og blir avslutta med det siste arrangementet på Åndalsnes 28. august. 3. august kjem arrangement-gjengen til Sauda.

– I utgangspunktet hadde me ønska arrangementet litt tidlegare på sommaren, men 3. august er null problem. Me har full kontroll, forsikrar Wahl.

Godt samarbeid

Ryfylke møtte sykkelklubbens Thomas Wahl og Cato Søndenå Karbøl utanfor Rådhuset i går, måndag. Karbøl jobbar til dagleg som arrangementssjef i Norges Cykleforbund og har vore innom heimbygda dei siste dagane.

– Me er veldig glade for å ha med oss Cato. Han kjenner miljøet godt og har vore svært god å ha når det gjeld sjølve søknadsprosessen. Det er ein del papirarbeid. Han har også erfaringar frå dei tidlegare Tour of Norway for kids-arrangementa i Sauda, seier Wahl.

For tredje gong

For, dette er nemleg tredje gong Sauda sykkelklubb er tildelt eit Tour of Norwy for kids-arrangement. Første gong var i 2017. Då deltok heile 347 barn. Andre gong var i 2018, då 260 barn stilte til start.

– Me går for ny deltakarrekord i år, seier Wahl.

Det er gratis å delta i arrangementet. Rittet er ope for alle mellom null og 12 år. Arrangementet er lagt opp med klassane Trehjulssykkel og sparkesykkel», 5-6 år», 7-8 år» og 9-12 år».

– Og det er premiar til alle, fortel Karbøl.

– Me håpar at både fastbuande, turistar, hyttefolk stiller og at andre frå nabokommunar tar turen til Sauda for å bli med på denne folkefesten, seier Wahl.

Må stilla med vakter

Tour of Norway for kids kjem til Sauda med mannskap og effektar, og er også dei som ordnar med speakarteneste og premiar. Sauda sykkelklubb er i full gang med å førebu seg på sykkelfesten, og har sett ned ein eigen komité for arrangementet. Blant anna må sykkelklubben stilla med vakter og personell til både rigging av løypa og til vera vakter under sjølve arrangementet.

– På sjølve dagen må nok 12-15 personar frå klubben i sving, seier Karbøl.

Tour of Norway for kids er eitt av tre store arrangement Sauda sykkelklubb har på programmet sitt i 2022. Dei andre er sykkelrittet Haugesund – Sauda under Saudadagane, det andre er eit barne- og ungdomsarrangement ved pumptrack»-banen onsdag 8. juni.

– For oss er alle desse arrangementa viktige for rekruttering, og for å oppretthalda og auka interessa for sykkelsporten, seier Thomas Wahl, leiar i Sauda sykkelklubb.