Nå kan Sauda-bedrifter søke lokal straumstøtte

Kommunestyret i Sauda vedtok i januar å sette av inntil ti millionar kroner til straumstøtte i 2023 for lokale bedrifter. Sauda kommune vil gi straumstøtte kvartalvis og har nå fått på plass eit nettbasert søknadsskjema i samarbeid med Suldal kommune.

Lokale bedrifter som ønsker å søke om straumstøtte for dei tre første månadane i 2023, må søke innan 26. mai.

Opprinneleg var søknadsfristen 1. mai, men denne har blitt utvida sidan det har tatt litt tid for Sauda kommune å få på plass ei nettbasert løysing. Via Sauda kommune sine nettsider kan næringslivet søke støtte.

Men det er mange krav som bedrifter må oppfylle for å få straumstøtte.

Dette er krava:

Støtte for forbruk på inntil 50 000 kWh per verksemd per månad. Støtta dekker 80 prosent av kostnadane over 70 øre/kWh eks. mva. for straumforbruket.

Støtte for forbruk på over 50 000 kWh inntil 100 000 kWh per verksemd per månad. Støtta dekker 60 prosent av kostnadane over 70 øre/kWh eks. mva. for straumforbruket.

Grunnlaget er gjennomsnittleg spotpris i månaden.

Søknaden må dokumenterast med faktura for straum for kvart kvartal.

Målarnummer/Målepunkt-ID må vere registrert på eit organisasjonsnummer med kode næring. Det må kome fram av fakturaen.

Støtte til andre ekstraordinære kostnadar:

Støtte dekker differanse mellom historisk kostnadsnivå (til dømes gjennomsnitt 2021) og kostnadsnivå for omsøkt periode i 2023.

For å dokumentere behovet for ei slik støtte må ein legge ved eit oppdatert rekneskap.

Generelt for begge ordningane:

Stønad blir utbetalt kvar tredje månad etter søknad.

Ordninga gjeld alle små og mellomstore verksemder. Små og mellomstore verksemder blir definert som verksemder med mindre enn 100 tilsette og mindre enn 100 millionar kroner i årleg omsetning.

Ordninga gjeld ikkje for offentlege verksemder, kraftintensiv industri eller produsentar av kraft, og verksemda må stadfeste at dei ikkje er omfatta av ei tilsvarande statleg ordning.

Verksemda må også stadfeste at dei ikkje kjem over grensa for bagatellmessig støtte.

Bedrifter som mottar støtte kan ikkje utbetale utbytte for 2022 eller 2023.

Søkarar må ha betalt alle offentlege avgifter.

Ordninga er tillitsbasert og dei som misbruker ordninga må tilbakebetale støttebeløp – med renter.