Montering av underskjener på autovernet er eit viktig tiltak for å redusere talet på skadde og drepne på motorsykkel.
NPK
NAF MC: – Rett type autovern kan redde fleire liv
Dei siste åra har motorsyklistar vore overrepresenterte i ulykkesstatistikken, med rundt 20 dødsfall årleg. Den hyppigaste ulykkesårsaka er utforkøyring i sving. No reagerer NAF MC på at det ikkje blir sett opp underskjener på autoverna.
Autovern er laga for å fange opp bilar og andre køyretøy og er ikkje tilpassa motorsyklistar. Ved å montere underskjener på autovernet, kan ein også fange opp motorsyklistar ved ei ulykke.
– Dette reddar liv, men likevel blir det bygd og rusta opp vegar utan at ein tek omsyn til dei mest sårbare trafikantgruppene, seier Jan Harry Svendsen, leiar for NAF MC.
– Me har ein nullvisjon som seier noko om at ingen skal omkomme eller bli hardt skadde i trafikken. Då meiner me dette er ei rimeleg og fornuftig oppgradering av infrastrukturen langs vegane, seier MC-leiaren.
Innlandet går føre med eit godt eksempel. Der har dei starta med å ruste opp fleire strekningar og utstyrt desse med underskjener på autovernet.
