Dei siste tala frå Nav viser at 145.174 personar mottok arbeidsavklaringspengar (AAP) ved utgangen av juni.
NPK
Nav: Regelendring bidreg til fleire AAP-mottakarar
Dei siste
talta frå Nav viser at 145.174 personar fekk arbeidsavklaringspengar (AAP) ved utgangen av juni. Det er ein auke på 2050 personar i 2. kvartal. I 1. kvartal var auken over 3700.
Arbeids- og velferdsdirektør Hans Christian Holte ser auken i samanheng med at det sidan i fjor sommar har vore endringar i regelverket.
Får ny periode på AAP
– Mange av dei som når makstid på AAP, får halde fram på ytinga som følgje av regelverksendringane i juli 2022, mellom anna fjerning av karensperioden. Dette fører til at fleire blir verande på ytinga etter makstid, fordi dei har fått innvilga ny AAP-periode, seier Holte i ei pressemelding.
Størst har auken vore i Oslo, der auken i AAP-mottakarar det siste året har vore nesten 1700 personar eller 10,7 prosent. Blant resten av fylka var det stor prosentvis auke i Vestfold og Telemark (10,5 prosent) og Nordland (10 prosent).
Fylket med høgast del registrert med AAP, er Agder. Der er 5,4 prosent av befolkninga i aldersgruppa 18 til 66 år AAP-mottakarar.
Fleire med nedsett arbeidsevne
Ein annan medverkande faktor er at det blir fleire og fleire registrerte med nedsett arbeidsevne.
I juni 2023 var 212.100 personar registrerte med nedsett arbeidsevne, som er det høgaste talet sidan juni 2012.
Ifølgje Nav starta auken under pandemien etter fleire år med jamn nedgang.
