Ola (105) var Saudas eldste – nå er han død

Han var Saudas eldste – og med sine 105 år stod han den siste tida også oppført som éin av Norges eldste nålevande menn. Ola Sandvik blei fødd på Bråtveit i Suldal 27. februar 1917, midt i ein søskenflokk på ni, der han levde lengst av alle ni.

Ola Sandvik blei heile 105 år og 187 dagar då han døydde fredeleg på Sauda distriktsmedisinsk senter fredag i sist veke. Etter Ola Sandvik er det mange etterkommarar. Han og kona fekk tre døtrer. Då Ryfylke intervjua Ola Sandvik i samband med hundreårsdagen i februar i 2017 fortalde han at han då hadde fem barnebarn, seks oldebarn og eitt, snart to tippoldebarn. I intervjuet sa Sandvik at han såg det som uproblematisk å bli hundre år, han syntest det var verre å tenka på at han var far til ei oldemor.

Sandvik flytta til Sauda i 1950, då han tok seg arbeid på fabrikken. Han budde då først på hybel, medan han leita etter eit husvære han kunne dela med kona og dei då to døtrene Ingrid og Kari Liv. Seinare kom også dottera Astrid til. Den vesle familien budde først i leigde rom på Longabakka, flytta vidare til Rød, derifrå til Ringhagen, før dei omsider klarte å få kjøpa seg eit eige hus på Egne Hjem.

Ola Sandvik, som hadde skulert seg innan teknisk og mellom anna hadde jobba fleire år innan gruvedrift, starta først som ferievikar på kabelbanen. Seinare var han innom arbeid i omnshuset, før han fekk seg arbeid ved kontoravdelinga, der han både jobba på lønningskontoret og på statistikk-kontoret. I over 30 år var fabrikken hans faste arbeidsplass. I 1982, då han var 65 år, pensjonerte han seg. I 2000 blei han enkemann.

Ola Sandvik blir gravlagt frå Solbrekk kapell fredag 9. september.