LO-leiar Peggy Hessen Følsvik orienterte riksmeklar Mats Ruland og motparten NHO om LOs streikeuttak tysdag ettermiddag.
Viss partane i lønnsoppgjeret ikkje blir samde innan midnatt natt til søndag, kan 22.947 LO-medlemmer bli tekne ut i streik – i første omgang. Totalt kan rundt 185.000 LO-organiserte bli tekne ut viss ein storstreik i frontfaget blir langvarig.
– Vi har alltid som mål å bli samde, men er godt førebudde på streik, seier Følsvik.
Stengde ølkraner og stengde ferjer
I første omgang vil 22.947 blir tekne ut i streik. Ein eventuell streik vil ramme verksemder over heile landet, ifølgje ei oversikt frå LO.
Fleire av uttaka skjer hos bryggjeri som Ringnes, Hansa og Mack. Dermed kan stengde ølkraner bli ei følgje av streiken.
Også matindustrien, under dette Orkla, og dei store industrilokomotiva i leverandørindustrien, der Fellesforbundet har mange medlemmer, kan rammast hardt. Dette gjeld bedrifter som Aker Solutions, Aibel, Kaefer og STA for å nemne nokon.
I tillegg vil ferjetransporten landet rundt bli ramma generelt.
Varslar storstreik
Meklinga startar fredag. Partane møtest til tvungen mekling fredag formiddag. Viss dei ikkje blir samde innan fristen går ut ved midnatt natt til søndag, kan det same dag bli streik.
Konflikten vert sett i verk frå byrjinga av arbeidstida, seinast klokka 6 søndag 16. april. LO legg opp til å ta ut tilsette i eit breitt Spekter av bransjar over store delar av landet viss det blir konflikt.
YS varsla tidlegare tysdag at nesten 1.500 medlemmer kjem til å bli omfatta av det første uttaket til organisasjonen.
Krev meir å rutte med
Både YS og LO krev å sikre arbeidstakaranes del av verdiskapinga og auka kjøpekraft.
Etter fleire år med reallønnsnedgang, må det takast grep for at arbeidstakarane ikkje skal sakke endå lenger etter prisutviklinga, krev dei.
– Norske arbeidstakarar har teke ansvar gjennom fleire utfordrande år for norsk arbeidsliv, med pandemi og høg prisvekst. No ser vi at mange bedrifter går veldig godt og overskota er høge. Målet vårt er å jamne ut forskjellar mellom folk og sikre at norske arbeidstakarar får sin del av verdiskapinga, seier Følsvik.
