Ønsker mindre vatn i Fetavatnet og Slettedalsvatnet
Rehabilitering av dam Fetavatnet gjer at Saudefaldene har behov for å senka vasstanden.
Etter gjeldande konsesjon skal vassnivået i Fetavatnet ligga maksimalt 1,5 meter under høgaste regulerte vasstand, HRV, frå 15. juni til 30 september. Slettedalsvatnet skal maksimalt ligga ti meter under HRV mellom 15. juli og 30. september.
Denne sommaren kan dei to magasina imidlertid bli uvanleg nedtappa gjennom sommarsesongen.
Annonse
For å legga forholda best muleg til rette for rehabilitering av dam Fetavatnet, søker kraftselskapet Saudefaldene nå NVE om å få halda vasstanden i Fetavatnet nær lågaste regulerte vasstand, LRV, gjennom sommaren. Dette vil innebera at vassflata kan bli liggande ti meter under normalt sommarnivå.
Eit konstant nedtappa Fetavatn betyr at alt tilsig må tappast vidare via overføringstunnelen til Slettedalsvatnet. For å sikra at Slettedalsvatnet kan brukast mest muleg som normalt og for å sikra nok magasinvolum til å handtera varierande tilsig, søker kraftselskapet om å få senka vassnivået i Slettedalsvatnet fem meter lågare enn normalt minimumsnivå om sommaren.
Søknaden er sendt ut på ein avgrensa høyring til kommunen, fylkeskommunen og statsforvaltaren, der Sauda kommune alt har svara at dei ikkje har merknader til søknaden om å senka sommarvasstanden i dei to magasina.
