Rebekkalogen i Sauda – lokalt engasjement i praksis
Me i Rebekkalogen i Sauda har hatt ein aktiv og innhaldsrik haust med mykje godt arbeid og fine møte mellom folk. Det er alltid kjekt når me kan gjere noko som både samlar bygda og støttar gode føremål.
Den 15. oktober gjennomførte me den tradisjonsrike basaren vår, og det vart ein fantastisk kveld med fullt hus, nydeleg stemning og mange utruleg fine premiar som var gitt av butikkar og bedrifter i Sauda. Me er svært takksame for all støtta frå det lokale næringslivet – utan dei hadde ikkje basaren vorte den same! Mange kosa seg med smørbrød, kaker og hyggeleg prat, og til slutt kunne me overrekkje 15 000 kroner til Sauda jeger- og fiskerforening sitt barne- og ungdomsarbeid. Det kjennest godt å bidra til aktivitetar som gir barn og unge gode opplevingar i naturen.
Den 8. november arrangerte me loppemarknad til inntekt for Odd Fellow Ordenen si landssak. I år går denne til utviklinga av eit diagnoseverktøy – ein CT-skannar til bruk i redningshelikopter. Dette er eit svært viktig prosjekt som kan redde liv ved hjerneslag, særleg for oss som bur i distrikta og har lang reiseveg til næraste sjukehus. For kvart minutt utan riktig behandling mistar ein to millionar hjerneceller, og difor tel kvart bidrag. Gjennom loppemarknaden samla me inn fleire tusen kroner til saka.
Annonse
Me i Rebekkalogen arbeider for venskap, nestekjærleik og hjelpande hender i stillferdigheita si ånd. Gjennom slike arrangement får me oppleve kor mykje godt som kan skapast når mange bidreg litt kvar. Me takkar alle som har delteke, støtta og bidrege – saman gjer me ein skilnad for bygda vår.
