Regjeringa: Folketalet i distriktskommunar skal auke

– Målet er at folketalet skal auke i distriktskommunane. Alle lokalsamfunn skal kunne utvikle seg og skape verdiar, seier kommunal- og distriktsminister Sigbjørn Gjelsvik (Sp).

Han presenterte tysdag stortingsmeldinga på Sølvane gard i Gloppen kommune i Vestland.

Tidlegare har målet vore å halde oppe hovudtrekka i #busettingsmønster.

Regjeringa ønskjer ei tydelegare differensiering i arealpolitikken og går inn for at kommunane skal få bestemme meir sjølv. Regionale og lokale behov skal vektleggjast meir.

Distriktskommunar kan søkje om bygdevekstavtalar med staten, og fleire slike pilotar er på plass allereie i Finnmark og Trøndelag.

– Vi kjem til å følgje opp bygdevekstavtalane med meir statlege pengar, også til å gjennomføre konkrete prosjekt, seier Gjelsvik.

Regjeringa har sett seg som mål å sikre at alle har tilgang til høgfartsbreiband i løpet av 2025. Fylke med mange distriktskommunar skal prioriterast i køen.

Regjeringa vil dessutan ha ei jamnare fordeling av statlege arbeidsplassar og satse på bustadpolitikk i distrikta.

I budsjettforliket med SV vart låneramma til Husbanken auka med 3 milliardar kroner.

– Vi vil vurdere om ein større del av låna frå Husbanken skal gå til bustadbygging i distriktskommunar, særleg i dei minst sentrale kommunane, seier Gjelsvik

(NPK)