Så mykje bonus samla saudabuen i fjor
Coop utbetalar rekordhøgt utbytte nasjonalt, medan Trumf-kontoane i Sauda har vakse seg store i 2022. Her er dei lokale tala frå daglegvarekjempane.
Coop melder om ei auke i kjøpsutbytte til sine medlemmer frå 2021 til 2022. Coop utbetalte tre millionar kroner i utbytte til sine medlemmer busette i Sauda kommune for året 2021. I år blir det delt ut utbytte for 2022, og summen har auka med over 100 000 kroner til 3,1 millionar kroner.
Den sterke veksten som Coop Sørvest meldte i fjor, har med andre ord halde fram også i 2022. Coop passerte også to millionar medeigarar i fjor, som til saman oppnådde eit kjøpsutbytte nasjonalt på 1,3 milliardar kroner.
Annonse
– Det er ei utvikling vi har sett over fleire år at stadig fleire yngre blir medeigarar i Coop, seier organisasjons- og medlemsdirektør i Coop Norge, Jostein Dyngeland, i ei pressemelding.
– Stabil auke
Norgesgruppen og deira Trumf er framleis eit lite hovud høgare enn sin konkurrent. For fjorårets handel i butikkane Kiwi, Meny, Spar og Joker har medlemmane spart opp 1,44 milliardar kroner. 2,5 millionar nordmenn er Trumf-medlemmer, og desse har i snitt tent opp 600 kroner i bonus.
Annonse
I Sauda har Trumf-medlemmane i snitt over 900 kroner på sine bonus-kontoar. Det er kundane ved daglegvarebutikken Kiwi som står for omsettinga, og desse sparte i 2022 opp 1,7 millionar kroner i bonus.
– Vi har hatt stabil vekst i tal på nye medlemmer dei siste åra, med ei særleg auke gjennom pandemiperioden. Det siste året med økonomisk og politisk uro og auka kostnader har også bidratt til at kundane er blitt meir bevisst på Trumf-medlemskapet sitt, seier daglege leiar i Trumf, Kristin Bigseth, i ei pressemelding frå Norgesgruppen denne veka.
