Sauda Ferie & Fritid og Sauda Vekst på flyttefot
Sauda sentrum får fem nye kontorarbeidsplassar og turistinformasjonen blir sentralt plassert.
Sauda Ferie & Fritid, Sauda Vekst og takstmann Ivar Johannes Handeland har hatt felles arbeidsplass i Øgreidbygget rett ved Sauda Politistasjon. Sauda Vekst eig Sauda Ferie & Fritid. Nå har dei flytta opp i Brugata, i bygget som blir kalla ”Det gamle Folkets Hus”.
Med på flyttelasset blir takstmann Ivar Johannes Handeland.
Annonse
– Han grein seg med, gliser Ragnar Fosstveit i Sauda Ferie & Fritid.
I og med at Sauda Ferie & Fritid flytter så betyr det at turistinformasjonen også flyttar. Sauda Ferie & Fritid har dei siste åra drifta turistinformasjonen på oppdrag frå Sauda kommune. Turistinformasjonen er tilgjengeleg heile året i lokala til Sauda Ferie & Fritid, men åtte veker om sommaren har turistinformasjonen hatt utvida opningstider og halde til i kulturhuset Folkets Hus.
Ragnar Fosstveit reknar med at dei skal drifte turistinformasjonen vidare, når nåverande avtalar med Sauda kommune etter kvart går ut.
– Da ser eg for meg at me driv turistinformasjonen i dei lokala me held til i nå, også i høgsesongen om sommaren. Dette er sentrumsnære lokale, seier Fosstveit.
Annonse
Sjølv om det ikkje er parkeringsplassar for besøkande i Brugata, er det fleire offentlege parkeringsplassar tett på og dei ser det som gunstig å vere tettare på sentrum.
Det same synet deler Endre Abotnes i Sauda Vekst.
– Me kjem tettare på næringslivet i desse nye lokala. Det ser eg på som ein fordel, seier Abotnes.
Totalt er dei fem tilsette som flyttar inn i arbeidsfellesskapet i Brugata. Sauda Ferie & Fritid har to tilsette. I tillegg har dei ein person som i nokre månader arbeider i språkpraksis hos dei. Ilona Moiseichuk frå Ukraina, som har jobba med reiseliv i Ukraina og har bachelor i historie og master i historie og arkeologi.
Også Sauda Vekst har to tilsette, etter at Aasta Eik-Nes begynte å arbeide i stillinga som digital marknadsførar. Saman med takstmann Handeland var dei i full gang med å få alt på plass i dei nye lokala fredag.
– Me må få på plass profilering og slikt på utsida, konstaterer Endre Abotnes, og ser på dei nakne vindauga som foreløpig ikkje avslører kven som held til på innsida.
Annonse
Tannlege Rossemyr var tidlegare leigetakar i desse lokala.
