Saudabuen mest fornøgd med kulturtilbodet
Ny rapport viser at ingen rogalendingar er meir fornøgd med kulturtilbodet i kommunen sin enn saudabuane. Er det kulturaktørane som er dyktige, eller er innbyggarane i Sauda bare lette å glede?
Landsomfattande undersøkingar ligg bak rapporten Norsk Kulturindeks, som er gjort av Telemarksforskning. Rapporten tar for seg tal, statistikk og tendensar innan kulturlivet kommune for kommune, og tar ikkje for seg idrett, organisasjonsliv eller anna frivillig arbeid. Det er den generelle tilfredsheita innbyggarane har overfor kulturlivet, enten som deltakarar eller som brukarar av tilboda. Har Sauda eit kulturtilbod å vere fornøgd med?
”Ja”, er det klare svaret saudabuen har gitt i undersøkinga. Sauda står nemleg på toppen i Rogaland når det kjem til denne tilfredsheita. Sett i eit nasjonalt perspektiv, er Sauda plassert heilt oppe på ein 14. plass i landet.
Annonse
– Det er eit stort kjeldeunderlag for desse tala, så dei er representative. For oss som jobbar med kultur i Sauda, er dette sjølvsagt veldig kjekt å sjå. Eg har ikkje fått gått inn i djupna på alle detaljane i rapporten, men det som viser tydeleg, er at vi i Sauda gjer ein del rett, og det er motiverande, seier kultursjef i Sauda kommune, Åshild Marie Øverland.
Sterke band
Det er fleire ting som tydar på at kulturaktørane i Sauda har gjort mykje rett, for Sauda blei i fjor nominert som Rogalands kandidat til den nasjonale utmerkinga ”Årets kulturkommune”. At tala frå Telemarksforskning no stadfester at kulturlivet i Sauda går rett veg, meiner kultursjef Øverland først og fremst fortel to ting.
– For det første er vi veldig gode på samarbeid i Sauda. Når vi vil få til noko, så bretter vi opp ermene og jobbar saman. Dette har vi mange eksempel på, som Andedammen, badeanlegget, Sneath´s park, ulike arrangement i byen, festivalar, ungdomstilbod, idrettsarrangement og ikkje minst Folkets Hus, som er eit flott symbol på dugnadsånd og verdien av å dra i same retning. Ein annan god grunn trur eg er saudabuen sitt sterke band til lokalmiljøet, industrien og historia vår. Folk engasjerer seg i dette, og er glade i arrangement som bygger på byens historie. Sjå bare på Sauda revy- og teaterlag, kor mange som har lyst å sjå deira førestillingar, som ofte handlar om lokale stader og folk, sier ho.
Annonse
Identitet
Då Folkets Hus sto klar i ny drakt i 2018, starta ein heilt ny kvardag for alle i Sauda som har kultur og kunst som jobb, som skulefag eller som fritidstilbod. Med kulturhusets utviding og modernisering kunne kommunen endeleg tilby topp moderne øvingslokalar, utstillingsstader, servering og nye salar. Smeltedigelen for det kreative og skapande Sauda hadde plutseleg blitt stort og funksjonelt.
– Eg trur både vi som jobbar med kultur og resten av Sauda blei litt overvelda då Folkets Hus stod ferdig. Det var mange som engasjerte seg i oppussinga, og det blei også finansiert blant anna gjennom folkeaksjar til innbyggarar og bedrifter. Eg trur mange føler eit sterkt eigarskap til bygget, og eg trur mange er stolte av det, seier ho.
Øverland fortel at spesialrådgivar innan kulturarv i Rogaland fylkeskommune, Jan Windsholt, har merka nettopp dette når han har vore i kontakt med saudabuen dei siste åra.
– Han seier at han har merka ei haldningsendring blant saudabuen, at dei er meir opptatte av å ta vare på identiteten sin dei siste åra. Det trur eg stemmer godt, seier ho.
Mangfald
Annonse
Eit godt kulturtilbod er med å skape trivsel i samfunnet, og i eit godt samfunn er det lettare å skape eit godt kulturtilbod. Kultursjefen trur også kultur er viktig for enkeltindividet i samfunnet. I Sauda ønsker ho at mangfaldet i kulturen skal stå sterkt, men ho er klar på at også smalare segment innan kulturen skal få sleppe fram.
– Eit samfunn er ikkje bygd opp av heilt like menneske. Det er folk med ulike interesser, ulik smak. For min del kunne eg godt ha tenkt meg at vi fekk til meir teater i Sauda, klassiske konsertar, jazz, og gjerne nokre fleire konsertar med ståande publikum, kanskje rock? Vi har alle muligheiter, og eit kulturhus som artistane gir veldig gode tilbakemeldingar på. Dei likar å spele her, seier ho.
Øverland trekker også fram dei som driv med kultur for eigen maskin i Sauda, som musikkorps, trekkspelklubben, revylaget og dei aktive kora, for å nemne nokre.
– Desse er med å skape interesse og rammer for dei som er interesserte, og det er generelt god oppslutting rundt slike fellesskap. Sjølv om Sauda er ein liten stad, er det god breidde i tilbodet og engasjementet. Eg trur at dette mangfaldet er med på å gjere Sauda til ein betre plass å vere, avsluttar Øverland.
