Saudasjøen Rundt for 31. gong: Erlend (36) har deltatt i alle Saudasjøen Rundt-løpa

– Eg skal sjølvsagt delta på laurdag. Det er ikkje snakk om å reisa bort eller gjera noko anna den helga. Så, ja, det går litt sport i det, seier Erlend Hardeland Saua.

Erlend var bare fire og eit halvt år då idrettslaget Ny Von for første gong arrangerte Saudasjøen Rundt i 1990. Arrangementet har blitt avlyst eit par gonger, men Erlend har stilt opp kvar gong det har blitt gjennomført.

– Eg trur eg hugsar dei første gongene. Eg hugsar iallfall at me då gjekk utover mot Svandalsfossen, og at det var start- og målområde ved campingplassen, fortel han.

Dette stemmer, for dei første sju åra av Saudasjøen Rundt var start- og målområde i Saudasjøen Rundt lagt til campingplassen, deretter kom fem år med start og mål ved monteringslaget», før arrangementet blei flytta til Risvoll skule i 2003.

Då Erlend Hardeland Saua var ti år deltok han for første gong i tidtakarklassen.

– Eg hugsar at ein måtte vera tolv år for å delta på tid i Saudamila, men i Saudasjøen Rundt kunne eg vera med som tiåing. Eg sprang nokre år, men liker best å bare gå turen nå, fortel han.

I dag er han sjølv far, som tar borna med på Saudasjøen Rundt-arrangementet.

Fem andre personar har deltatt i samtlege Saudasjøen Rundt-arrangement: Sigmund Saua (far til Erlend), Jon Ove Mehus, Kjellfrid Mehus, Norleiv Austerheim og Gunn Ildstad.

Nå på ein laurdag

Idrettslaget i Saudasjøen, Ny Von, har sidan begynnelsen på 1990-talet arrangert mosjonsløpet Saudasjøen Rundt. I løpet av dei 30 føregåande åra har løpet variert i både løypeprofil, i talet på deltakarar, i aktivitetstilbod – og i kva vekedag arrangementet blir lagt til.

– Me hadde det lenge på ein laurdag, men så blei det flytta til ein torsdag, både fordi det kolliderte med andre lokale arrangement og fordi det blei sagt at det var større sjanse for å få fleire lokale deltakarar på ein kvardag. Men nå er me tilbake igjen til eit laurdagsarrangement, seier Jon Ove Mehus, leiar i idrettslaget Ny Von.

Saudasjøen Rundt blir arrangert for 31. gong komande laurdag.

Ny tidtakarklasse

I fjor var det 97 deltakarar i løpet. Av desse deltok 42 barn, 34 trimmarar og 21 personar sprang i tidtakarklassen. Arrangøren har dei siste åra tatt fleire grep for å prøva å lokka til seg fleire deltakarar. Blant anna hadde dei i tre år trimquiz», der deltakarane i trimklassen fekk bryna seg på kunnskapsspørsmål undervegs i den 5,3 kilometer lange løypa.

Nå lanserer dei eit heilt nytt lågterskeltilbod: Ein tidtakarklasse der ein spring ei løype på to kilometer, og der deltakarane ikkje blir rangert på ei resultatliste.

– Løypa går frå Risvoll skule, over Hovland, ned ved kapellet, rundt industriområdet og opp til skulen igjen. Me håpar at dette kan vera eit kjekt tilbod for folk som gjerne vil konkurrera, fortrinnsvis med seg sjølv, utan at det treng å vera noko press eller høgt nivå. Ei nokså grei løype, med lite stigning, seier Mehus.

Kjekt for alle

Målet med å flytta Saudasjøen Rundt til ein laurdag, er å laga arrangementet til ein skikkeleg familiedag. Mehus lovar både speakerteneste, andre aktivitetar og sal av kioskvarer i start- og målområdet ved Risvoll skule.

– Og me har leigt inn eit hoppeslott for dei yngste borna. Me håpar at dette kan bli ein kjekk dag for både store og små, seier leiar Mehus.