Saudefaldene tente ufattelege 1,9 milliardar kroner i fjor
Dei høge straumprisane gjorde at Saudefaldene i fjor tente meir pengar enn kva dei tre åra i forkant gav i samla inntekter.
2022 gav inntektsbonanza for straumprodusentane. 2022-regnskapet er nå offentleggjort og viser nøyaktig kor mykje Saudafaldene tente.
Inntektene i fjor viser rekordhøge 1,9 milliardar kroner i inntekter. Dette er godt over dobbelt så mykje som i 2021, som den gang var eit rekordår for den lokale kraftprodusenten. Da var inntektene 782 millionar kroner. Dersom ein legg sammen inntektene i 2021, 2020 og 2019, tente Saudefaldene meir kun i 2022.
Annonse
Ein halv milliard kroner i utbytte
Driftsresultatet i fjor enda på solide 1,4 milliardar kroner. Selskapet måtte betale 669 millionar kroner i skatt. Dette gav eit årsresultat på 752 millionar kroner. Eigarane tok ut eit utbytte på 520 millionar kroner. Dei resterande 232 millionane blei brukt til å styrke eigenkapitalen.
Mesteparten av utbyttet hamnar hos Orkla, som eig 85 prosent av Saudefaldene. Sunnhordland Kraftlag, som igjen er eigd av Haugaland Kraft, eig dei resterande 15 prosentane.
Saudefaldene opplyser i regnskapet at dei hadde 35 tilsette ved årskiftet 2022/2023. Det minst interessante i regnskapet er at styret konkluderer med at det er økonomisk grunnlag for fortsatt drift av selskapet.
Annonse
– Cirka halvparten av driftsresultatet går tilbake til stor-samfunnet
Saudefaldenedirektør Svein Ilstad opplyser at han først og fremst er glad for at selskapet ikkje hadde skader på tilsette og heller ikkje hadde miljøhendingar i 2022. Når det gjeld dei økonomiske tala opplyser Ilstad at tilsig og nedbør i fjor gav ein normalproduksjon.
– Med dei høge straumprisane gav dette naturleg nok eit svært godt resultat. Dei tilsette i Saudefaldene har også sin del av æra: Kraftanlegga har vore godt vedlikehalde og både kraftverk, linjer og luker var tilgjengelege da me trengte dei. Det er også gjort ein god jobb på styring, overvaking og optimalisering, seier Ilstad.
Han opplyser at Saudefaldene hadde noko høgare kostnader i 2022, som hovedsakeleg skuldast ein del større prosjekt som er sett i gong.
Sjølv om dei rekordhøge straumprisane gav tidenes rekordresultat for Saudafaldene, påpeiker Ilstad at mykje av inntektene frå kraftproduksjonen går til samfunnet.
– Cirka halvparten av driftsresultatet går tilbake til stor-samfunnet gjennom ulike skatter og avgifter, seier Svein Ilstad.
Annonse
Saudefaldene regnskap:
| 2022 | 2021 | 2020 | |
| Driftsinntekter | 1 911 mill. | 782 mill. | 479 mill. |
| Driftsresultat | 1 411 mill. | 333 mill. | 30 mill. |
| Årsresultat | 752 mill. | 97 mill. | 19 mill. |
| Utbytte | 520 mill. | 61 mill. | 13 mill. |
