Selt for 900 000 kroner over prisantydning
I Sauda må ein rekne med å betale det dobbelt så mykje for leilegheit som for einebustad, ifølge saudameglar.
Leilegheita på bildet blei nyleg selt, etter ein heftig budrunde, for 4.150.000 kroner. Prisantydninga var 3.250.000 kroner.
– Ja, det stemmer. Det var noko overraskande at den gjekk så høgt, men samtidig ikkje sjokkerande. Leilegheita har høg standard, heis, parkeringsanlegg, gode solforhold, og er sentrumsnær. Det er punkt som dei fleste ser etter i ei leilegheit, seier eigedomsmeglar Kurt Inge Nybru i Aktiv Sauda, som formidla leilegheita.
Annonse
– Stor etterspørsel
Den 92 kvadratmeter store leilegheita ligg sentralt i sentrum, eit steinkast frå Saudahallen og Folkets Hus. Den har to soverom og ope stove- og kjøkkenløysing. At den blei selt nesten ein million over prisantydning, kan ha vore eit spesielt tilfelle, utan at meglar Nybru vil konkludere på nokon måte.
– Vi kan ikkje seie at prisen som blei oppnådd er den nye normalen, då dette var eit spesielt godt objekt med to budgivarar som til slutt ikkje ville gi seg. Det er, og har i lang tid vore stor etterspørsel etter leilegheiter, men alt for lite tilbod, seier Nybru.
Dobbelt så dyrt
Annonse
Den store etterspørselen i forhold til leilegheiter på marknaden, kan ifølge meglar Nybru føre til utfordringar for dei som ønsker å byte ut hagestell, husmaling og vedlikehald på einebustad – med ein enklare kvardag i leilegheit.
– Når det først dukkar opp ei leilegheit for sal er det mange som er interessert, spesielt på nyare, innflyttingsklare leilegheiter. Eg synest synd på alle som ønsker seg leilegheit, spesielt når tilbodet er så lågt og prisdifferansen mellom leilegheit og einebustad er så stor. I byane kan ein gjerne gå frå einebustad til leilegheit i same prisklasse, medan i Sauda må ein i grove trekk betale det dobbelte for leilegheita som ein får for huset sitt, seier Nybru til slutt.
