Sivilombodet: – Nav gir for dårlege grunnar for avslag

Sivilombodet har no levert ein rapport til Nav med funn og tilrådingar, skriv dei i ei pressemelding.

– Det må vere ein føresetnad at avslag på velferdsytingar frå Nav blir godt grunngitt. Det har noko å seie for tillit til avgjerda og for høvet til å oppdage feil. For at mottakaren skal kunne klage på vedtaket, må innhaldet og grunngivinga vere forståeleg, seier sivilombod Hanne Harlem.

Nav har vist til relevante lovføresegner og faktum i vedtaka sine, som er eit minimumskrav til grunngivingar. Dette er likevel ofte ikkje tilstrekkeleg for at mottakaren skal kunne forstå avslaget.

Dei delvis automatiserte sjukmeldingsavslaga var skjematiske og knappe, noko som gjer det vanskeleg å etterprøve kva vedtaket bygde på.