Skal halde si eiga kunstutstilling gjennom helga

Saudabuen Trond Carsten Øye er ein ivrig hobbykunstnar. Til helga innreier han Nyesalen i Folkets Hus og byr på kunstgalleri.

– Eg vil stille ut rundt 30 verk. Det er både måleri og teikningar, store og små, opplyser han.

Øye har vore hobbykunstnar i mange år, men har ikkje prioritert utstillingar. 2018 var sist gong han deltok i ei utstilling, der fleire hobbykunstarar heldt felles utstilling i Folkets Hus.

– Eg har tenkt på det i mange år at eg skulle lage til ei utstilling. Verka eg skal stille ut i helga er produsert i løpet av dei siste ti åra. Fleire av desse har aldri vore stilt ut før. Det blir ei salsutstilling, men nokre av verka har eg lånt tilbake for helga. Dei er ikkje til sals, seier Øye, og legg til at han har tatt på seg fleire private oppdrag dei siste åra, der han måler på bestilling.

Ifølge Øye er nokre av måleria han skal stille ut ikkje heilt ferdig ennå.

– Eg stiller dei ut for å vise litt av prosessen, seier han.

Han opplyser at stilen hans er klassisk figurativ, og at han ikkje driv med abstrakt kunst. Sommaren 2017 budde han hos Odd Nerdrum, for å lære av den kjente kunstnaren.

– Nokre av måleria eg stiller ut er portrett, eller av landskap som nok mange vil kjenne igjen. Men det blir også andre typer bilder, seier Øye.

Kunstutstillinga opnar laurdag og vil vere tilgjengeleg for publikum gjennom heile helga.

– Eg vil vere til stades under mesteparten av utstillinga. Det er bare hyggeleg viss folk kjem og vil slå av ein prat om utstillinga, seier Trond Carsten Øye.