Skal teste ut ekstrem-kolonne over Haukelifjell

Statens vegvesen skal denne vinteren teste ut kolonnekøyring for tungtransport under forhold som inneber stenging av overgangen for normal transport. Det er altså ikkje kven som helst som får følge med den spesielle kolonnen.

– Dette blir ikkje ein ordinær kolonne. Dette blir ein eigen kolonne under svært krevjande forhold, fortel Ingmar Ulvenes, seksjonssjef for Drift sør i Statens vegvesen, i ei pressemelding om planane.

– Krevande

Statens vegvesen har samarbeidd med Norges Lastebileier-Forbund og entreprenør Mesta om å lage planane for den nye tungbilkolonnen.

– Vi har saman jobba med risikovurderingar, tryggleiken og føresetnadane for å utfordre ein stengd veg, seier Ulvenes vidare.

Han fortel at naturkreftene skal utfordrast, samtidig som tryggleiken skal vere ivaretatt.

– Det blir krevande forhold, men tryggleiken for brøytemannskapa og sjåførane som skal over fjellet, er framleis det viktigaste, seier han.

Kjøpt inn hjullastar

Tungbilkolonnen vil ifølge Ulvenes bestå av færre bilar, ettersom det både er spesielle forhold og særskilte krav for å få følge ein slik kolonne.

– Det vil bli strenge krav til både køyretøy og sjåfør for å få vere med. Mange yrkessjåførar har vore ute ei vinternatt før og er godt vande med kolonnekøyring, men det er ikkje alle som har denne erfaringa. Krav til dekk, tettlenka kjettingar, minimum halv drivstofftank, slepekrok, varme klede, mat og drikke er nokre av krava som vil bli stilt, fortel Ulvenes.

Statens vegvesen har kjøpt inn utstyr, blant anna ein hjullastar med fres, for å vere førebudd på testinga av den nye typen kolonne i vinter, opplyser dei i pressemeldinga.