Småkraftverka i Sauda tente enormt med pengar i 2022

Straumprisane eksploderte i 2022 på grunn av krigen i Ukraina og den påfølgande frykta for stor gasskrise i Europa. Privatpersonar, og særleg næringslivet, enda opp med svært høge straumrekningar. For kraftprodusentane enda det med enorme inntekter.

To av småkraftverka i Sauda er delvis eigd av grunneigarane, og begge kraftverka har akseptabel straumproduksjon til å vere småkraftverk. Dette er Mosbakka Kraft AS og Risvollelva Kraftverk AS.

Mosbakka Kraft har vore i drift sidan 2010. I mange år sette dette kraftverket meir grå hår i hovudet på eigarane, enn kva det gav inntekter. Fleire gonger måtte eigarane gå inn med pengar for å unngå at selskapet gjekk konkurs. I 2020 var inntekten til småkraftverket på stusselege 1,1 millionar kroner. Men på slutten av 2021 begynte straumprisane å stige vesentleg. Småkraftverket enda det året opp med 6,7 millionar kroner i driftsinntekter. I fjor blei inntektene eventyrlege 19 millionar kroner. Driftsoverskotet blei på utrulege 15 millionar kroner og årsresultat enda på 10,8 millionar kroner.

Litt i utbytte

Eigarane, som neppe hadde sett for seg at dei kunne ta ut utbytte i uoverskueleg framtid, kunne til og med unne seg nokre kroner i utbytte. Men nesten heile driftsmarginen blei pløyd inn i selskapet for å få eigenkapitalen opp på eit meir fornuftig nivå.

1,2 millionar kroner blei tatt ut i utbytte, men dette er ikkje i nærheita å dekke inn dei sju millionar kronene som dei har vore nøydd til å tilføre selskapet etter byggestarten i 2008 for å unngå konkurs.

Rakk gullåret

Også Risvollelva Kraftverk er eit småkraftverk som sette grå hår i hovudet på eigarane. Valet av den eine utanbygds entreprenøren var av det svært uheldige slaget og utbygginga blei kraftig forseinka. Prosjektleiaren la ikkje skjul på at han var ekstremt fortvila. Men småkraftverket blei ferdig i tide til å få med seg gullfesten.

I sitt første driftsår enda Risvollelva Kraft opp med utrulege 27,6 millionar kroner i inntekter, noko som gav eit driftsresultat på heile 20,4 millionar kroner og eit årsresultat på 14,2 millionar kroner. Alt det første driftsåret kunne eigarane unne seg litt utbytte, men også dette selskapet valde å bruke det aller meste av overskotet til å redusere gjelda til selskapet.

Sju millionar kroner blei tatt ut i utbytte. 4,55 millionar kroner av utbyttet gjekk til majoritetseigar Sunnhordland Kraftlag AS. Dei resterande 2,45 millionar kronene blei fordelt på dei sju grunneigarane. Ingen av grunneigarane har store nok aksjepostar til at det vil dukke opp italienske sportsbilar i garasjane i Fosstveit-området med det første.

Det er også småkraftverk i Fivelandselva og Svandalselva. Desse to kraftverka er 100 prosent eigd av utanbygds småkraftutbyggarar og har ikkje regnskapstal tilgjengeleg som Ryfylke har oversikt over.

Mosbakka Kraft AS

Årsproduksjon: 15 GWh estimert

Eigarar:

Risvollelva Kraftverk AS

Årsproduksjon: 20 GWh estimert

Eigarar: