Spår låge straumprisar fram til oktober

Analytikarar spår låge straumprisar fram til oktober. Ei årsak er at Noreg har langt meir vatn lagra enn på same tida i 2022, då straumprisane var rekordhøge.

Den siste veka har straumen kosta mellom 30 og 40 øre per kilowattime i snitt i heile landet. Tilsvarande veke for to år sidan var prisen opptil 308 øre per kilowattime. Då var fyllingsgraden i det sørlege Noreg på 55,1 prosent, medan vi no har ein fyllingsgrad på 78,4 prosent, melder NRK.

Regionsjef Svein Ilstad i Statkraft Sør seier at magasinsituasjonen akkurat no er normal.

– At det er normale mengder vatn i norske vassmagasin er eit godt teikn med tanke på å få ein meir normalisert straumpris. Det er for tidleg å seie korleis prisane blir til vinteren, men det er eit godt teikn slik det er no, seier han til NRK.

Olav Botnen er senioranalytikar i Volt Power Analytics. Han trur at i Sør-Noreg og på Vestlandet vil prisane halde seg på 40 til 50 øre per kilowattime til oktober. Han trur på prisar på rundt 80 øre kilowattimen til vinteren. I Midt-Noreg og Nord-Noreg blir prisane endå lågare, han trur ein stad mellom 40 og 50 øre per kilowattime.

Samstundes seier statssekretær Elisabeth Sæther (Ap) i Energidepartementet at det ikkje blir endringar i straumstøtteordninga korkje i år eller neste år. Ho minner likevel om at støtta er mellombels.

(NPK)