Startar profesjonelt utleigefirma i Sauda

To av dei fire leilegheitene som er under bygging i det nye leilegheitsbygget ved Sauda Skisenter, vil bli disponert av Sauda Rentals for utleige. Målet er å knytte til seg fleire hytter og leilegheiter slik at turistar og utanbygds firma har eit tilrettelagt og oversikteleg leigetilbod i Sauda.

Bak Sauda Rentals står Sauda Skisenter, Sauda Klubb, fleire lokale firma gjennom Svandalen Utvikling AS og ein profesjonell uteleigeaktør i Haugesund, som er ihuga saudafan.

– Eg har hatt fritidsbustad i Sauda i 20 år, seier Jaakko Isotalo, som er styreleiar i det nystarta Sauda Rentals.

Han er opprinneleg frå Finland, men har busett seg i Haugesund, der han har bygd opp industrikonsernet og utleigebyrået Big House AS, som tilbyr utleige i Haugeund, Stavanger og på Stord. I tillegg driv ham med eigedomsinvesteringar og andre investeringsprosjekt.

Begeistra for Sauda

Da Sauda Skisenter ville bygge leilegheitsbygg rett ved skiheisane var han tidleg på banen.

– Eg har investert i to leilegheiter i det første leilegheitsbygget. Heile familien er begeistra for Sauda Skisenter og Sauda sentrum, ikkje minst i vinterhalvåret. Eg har stor tru på gondolprosjektet Folkeheisen og er sikker på at det vil bli ein realitet. Det vil løfte Sauda Skisenter og Sauda opp i ein ny divisjon som turistdestinasjon, seier Jaakko Isotalo.

Han opplyser at dei ønsker å bygge opp Sauda Rentals gradvis. I første omgang begynner dei med eit begrensa utleigetilbod.

– Me må teste ut systema. Me må gjere dette skikkeleg, viss me skal gjere dette, seier Isotalo.

Ønsker avtale med hytteeigarar

Dei er også interessert i å kome i kontakt med for eksempel hytteeigarar, fortrinnsvis i Svandal, som ønsker å leige ut hytta i periodar.

– Dette kan vere hytteeigarar som ønsker å bruke hytta i høgtider, men som kan vere interessert i å leige ut hytta ellers. Kanskje det er hytteeigarar som ønsker å redusere det auka utgiftsnivået når det gjeld straumkostnader og høgare bankrenter?

Jaakko Isotalo ser ein marknad overfor utanlands turisme og oljeserviceselskap i Stavanger som ønsker å leige hytter og leilegheiter tett på skibakkane i Sauda.

– Fjordline er blant anna interessert i ein kontrakt. Men da må me ha ein størrelse på porteføljen me kan tilby og eit tilrettelagt system. Det er det me ønsker å bygge opp nå, seier Jaakko Isotalo.

Ser mulegheiter i gondol

Han opplyser også at dei ønsker å få på plass eit ”VIP-kort-produkt” for leigetakarar, som gir rabattar på heiskort, skiutleige og andre tilbod og varer i Sauda, for å gjere det enda meir attraktivt å bestille overnatting i Sauda og benytte seg av tilboda i Sauda.

I dag er Jaakko Isotalo kun i Sauda på hytta i helger og i feriar. På sikt håper han at Sauda Rentals kan utvikle seg slik at han både kan kombinere helgebesøk, men også bli igjen for å jobbe nokre dagar i Sauda for å utvikle dette konseptet og andre aktivitetar vidare. Særleg ser han mulegheiter i gondolprosjektet og målet om å gjere Svandal om til ein heilårs turistdestinasjon.

Politisk bestilling

Dagleg leiar Lars Reidar Fosstveit i Sauda Skisenter opplyser at etableringa av Sauda Rentals blant anna er for å svare ut dei politiske målsettingane i kommuneplanen.

– Det er eit ønske om å tilby fleire varme senger for turistar i Svandal. Me ser eit behov for å kunne samordne denne type utleige og få sett det i eit system. I tillegg må det vere eit gjennomført opplegg. Det skal stå ”Sauda Rentals” på sengeklede og handklede. Det kan ikkje vere bestemors gamle sengetøy, seier Fosstveit.

Fosstveit er glad for at dei har knytt til seg ein utanbygds aktør som har erfaring med utleige.

– Me treng folk som kan sjå oss i korta og sjå Sauda på ein annan måte enn kva me gjer, seier Lars Reidar Fosstveit.