Stengte dører på avishuset

Ei rekke av Ryfylke sine datasystem som blir brukt til alt frå oppdateringar av nettavis til kundeopplysningar og annonseproduksjon skal nå skiftast ut. Dette skal fysisk skje i løpet av dei neste dagane, og dette vil blant anna medføre at dei tilsette vil vere heilt utilgjengeleg i periodar.

Torsdag 20. november er avishuset ope som normalt frå 08.00 til 15.30. Denne ettermiddagen, etter arbeidstid, startar teknikarar opp arbeidet med å oppgradere og oppdatere datautstyret på huset med nye program. Det vil bety at dei tilsette ikkje har tilgang på e-post fram til fredag formiddag.

Utilgjengeleg

Fredag 21. november skal dei tilsette gjennom opplæring og dei nye programma skal testast. Denne dagen vil avishuset vere stengt fram til klokka 13.00. E-post vil bli sporadisk svart på, og ein kan også oppleve å ikkje kome gjennom til avishuset på telefon.

Måndag 24. november skal den digitale omlegginga til Ryfylke sin nettutgåve gjennomførast fysisk, styrt av it-ekspertar på austlandet. Avishuset vil vere stengt heile dagen, e-post vil sporadisk bli besvart, og dei tilsette vil i periodar vere utilgjengeleg også på telefon.

Denne måndagen vil den eksisterande Ryfylke-appen forsvinne, og bli erstatta av den nye. Alle abonnentar på nett vil etter denne dagen bli nøydde til å logge seg inn på nettutgåva på ny. Ein skal etter planen behalde sine vanlege brukarnamn og passord. Avisa ber abonnentar som treng hjelp, om å ta kontakt.

Avisa Ryfylke sine tilsette vil gjere sitt beste for å gjennomføre alle endringane på ein måte som går minst muleg ut over abonnentane og kundane, og avisa ber om forståing og tolmod dei kommande dagane. I dagens leiar kan ein lese meir om kvifor desse endringane er så viktige for lokalavisa.