Stor interesse for grøn kafé

Selskapet Iverson eFuels, som står bak den planlagte etableringa av ammoniakkfabrikken på Birkeland, har gjort det klart at dei ønsker at etableringsprosessen skal vere prega av dialog med innbyggarane i kommunen. Eit tiltak er ”grøn kafé”, der innbyggarar, næringsliv og selskapet sjølv møtast for å dele informasjon, innspel og spørsmål. Det første av desse arrangementa gjekk av stabelen måndag, og omlag 100 saudabuar møtte opp.

– Vi er veldig glade for at engasjementet er så stort rundt både ammoniakkfabrikken og industrien i Sauda i eit lengre perspektiv, seier hub-koordinator ved Iverson eFuels, Gunnar André Gauthun.

Detaljar

Under den uhøgtidelege kaféen var fleire representantar frå ammoniakkselskapet til stades. Administrerande direktør Hege Økland fortalte dei oppmøtte om selskapets visjonar og ammoniakkens framtid slik Iverson eFuels ser den føre seg. Ho svarte også på spørsmål frå salen.

– Samtalane gjekk veldig bra føre seg, og Torfinn Opheim gjorde jobben som ordstyrar. Vi hadde også med oss Sigmund Skoge, som er tilsett hos oss med sin ekspertise på ulike regelverk, konsesjonar og sikkerheit. Han fortalte ein del om detaljar rundt sikkerheita på området. Analysane av dette er eit pågåande arbeid, fortel Gauthun.

Blant anna kunne selskapet informere dei tilhøyrande på møtet at dei førebelse prognosane tydar på at tryggingssonane rundt fabrikkområdet kan bli noko mindre enn først antatt.

– Nyttig

– Vi fekk mulegheita til å forklare dei oppmøtte kva det er vi har tenkt med denne grøne kaféen, at dette skal vere eit forum der terskelen skal vere låg for å involvere seg og bli med på samtalane. Det var mange aktørar også innan næringslivet i Sauda som møtte opp, og eg trur nok dette la eit godt grunnlag for å arrangere fleire slike kaféar, seier Gauthun vidare.

Han fortel at samtalane under møtet var konstruktive, og han gir skryt til dei oppmøtte for sine spørsmål.

– Eg er glad for at saudabuen, både private og næringsdrivande, er såpass ”framme i skoa” og stiller gjennomtenkte og kloke spørsmål, blant anna rundt sjølve ammoniakken som skal produserast, motorane som drivstoffet skal brukast i, samt alt som har med straumpris å gjere. Dette var ei god oppleving, og eg trur det var ei nyttig samling som gav meirsmak, avsluttar han.