Stor interesse for kunst-utstillinga­ til TC

Nå er det verkeleg svung over kulturlivet i byen vår. Bjørn og Bjarte har nettopp vore her med humor og musikk, julekonsertane kjem tett som hagl, damene har sin eigen aften, og i helga slo Trond Carsten «TC» Øye til utstilling av måleri og teikningar. Laurdag var det altså klart for Trond Carsten Øye si kunstutstilling med ei profesjonell ramme i Folkets Hus, med andre ord ei flott oppleving for alle 70 som møtte på sjølve åpningen.

Eirik Fosstveit slo an tonen med roleg musikk som hobbymålar TC visstnok likar i bakgrunnen når han arbeider. Ordførar Håvard Handeland stod for den offisielle åpninga, og som vanleg imponerte han publikum, denne gong med solid, oppdatert kunsthistorie.

Ein kunstnar med bakkekontakt

TC kvitterte med ein fin, personleg takketale som gav meining for oss alle. 43-åringen gjekk nærare 40 år tilbake til møtet med Hans Gude sitt måleri hos farfaren. Den rolege mannen med stokk bak kyrne gav han ei oppleving av noko stort og tidlaust som kan føra til at ein ser verda og historia på ein annan måte, meinte kunstnaren.

Skiakrobat og natur

Utstillinga «Mellom menneske og landskap» hentar inspirasjon frå (nasjonal)romantikken, ein epoke prega av kjensle for natur og menneske. Det er jo heller ingen hemmelegheit at TC likar seg i naturen og er ein kunstnar på ski som tilsynelatande opphever naturlovene. Den jordnære hobbykunstnaren hadde sørga for at alle frammøtte hadde informasjonsark om dei 33 måleria og teikningane og prisliste på dei 25 kunstverka som var heilt ferdige og klare for sal.

Kjekt med utstilling

Søndag kveld møter eg ein særs nøgd TC i Nyesalen. Han har hatt godt besøk begge dagar, og han kan fortelja at han har selt 12-13 bilde i løpet av helga. Det vil neppe overraska nokon, for folk var rett og slett imponerte av kvaliteten, med god grunn. Underteikna likte naturleg nok spesielt motiv frå Buer/Fossdal og Hovlandsnuten, for ikkje å nemna fantastiske portrett av Åge Rødsås og Kjartan Fløgstad.