Sturla Hall Eik-Nes 80 år

Han er sonen til Randi (1915-2014) og Torbjørn Eik-Nes (1898-1984) og gjekk ut av gymnaset i Sauda i 1965 før han starta på medisinstudier i Munster i Tyskland. Sturla Eik-Nes er ein internasjonal anerkjent pioner innan medisinsk ultralyd og fostermedisin. Doktorgraden hans i 1980 representerte banebrytande arbeid i bruken av ultralyd og Doppler-målingar for å overvaka fosteret sin vekst og blodstraum. Han blei professor ved NTNU i 1985 og var sentral då Norge året etter innførte ultralydundersøkingar for gravide.

Sturla Eik-Nes etablerte også Nasjonalt senter for fostermedisin ved St. Olavs hospital i Trondheim i 1990. Professoren har vore president for både europeiske og internasjonale organisasjonar innan sitt fagfelt, og har skrive fleire bøker og 160 vitskapelege artiklar for å spreia kunnskapen. Sturla Eik-Nes er kommandør av St. Olavs Orden.

Den spreke pensjonisten med hytte på Tråskår blei sist observert i Allmannajuvet i sommar, mildt sagt uforskamma frisk og rask.