Tilrår at områdeplanen i Svandal blir sendt ut på høyring

Onsdag skal politikarane i Utval for samfunnsutvikling behandle forslaget til områdeplan i Svandal. Den omfattande planen har blitt jobba med i eit par år. Nå skal politikarane for første gong behandle den og ta stilling til om den kan sendast ut på høyring.

I si anbefaling til politikarane skriv kommuneadministrasjonen at det er fleire forhold i planen som ideelt sett skulle vore belyst, men at planmaterialet har god nok kvalitet til at den kan sendast ut på høyring.

Etterlyser avklaringar

Men kommuneadministrasjonen understrekar at forholda som må belysast betre må på plass før politikarane kan ta den opp til andre gongs behandling etter høyringsrunden.

Kommuneadministrasjonen etterlyser blant anna meir utfyllande informasjon om korleis Djuvsbotnvegen skal utbetrast. Vegen opp til Djuvsbotn er bratt og har behov for utbetringar. Ideelt sett burde den bli lagt om med tunnel, men dette blir vurdert til å bli altfor kostbart, samtidig som det vil medføre uønska terrenginngrep.

Kommuneadministrasjonen etterlyser også gjennomførbare heilskapelege løysingar for vatn, avløp og slokkevatn. Tilgang på slokkevatn er eit behov som brannvesenet har, ikkje minst i øvre del av Djuvsbotn sidan vegen opp har sine avgrensningar.

Delar av området ved nedre parkeringsplass manglar detaljreguleringsplan. Her er det snakk om at campingvogner kan stå til området bli utbygd, men kommuneadministrasjonen etterlyser nærare avklaringar rundt dette.

Nær dobling av p-plassar

Det blir også etterlyst krav til talet på ladepunkt for elbilar i planforlaget. I dag er det 687 parkeringsplassar for publikum ved skisenteret. I forslaget til områdeplan er det snakk om å legge til rette for 1178 parkeringsplassar. I tillegg kjem parkeringsplassar ved hyttene der det også blir etterlyst retningslinjer for ladepunkt for elbil.

I planforslaget blir det også etterlyst ei avklaring om eigarform på turløyper. Det er planlagt for ei turløype som skal gå frå Lyngmyr og heilt opp i skianlegget i Svandal.

Kommuneadministrasjonen meiner også det er behov for ein gjennomgang av rekkefølgebestemmelsane i planforlaget.

Planen i tråd med målet

Generelt meiner kommuneadministrasjonen at forslaget til områdeplan følger opp målsettingane i kommuneplanen, samt strategisk næringsplan når det gjeld reiseliv. Ei utvikling av området ved og rundt skisenteret for å styrke Svandal som reiselivsdestinasjon er ei lokalpolitisk målsetting. Det er eit uttalt mål om at dette skal skje gjennom konsentrert hyttebygging ved skisenteret, for å forhindre at for store urørte område blir brukt. Men det blir samtidig påpeika av kommuneadministrasjonen at ei fortetta utvikling også vil vere negativt for naturmangfaldet i dette området.

Områdeplanen legg opp til 500 nye hytter og fritidsleilegheiter, tre nye skitrekk, to gondolbanar og restaurant i Djuvsbotn og på Ravnafjell. Planforslaget legg også opp til at utleigehytter og -leilegheiter skal aukast vesentleg ved skisenteret. I dag er utleigemarknaden i Svandal nær ikkje-eksisterande.

Når planen har vore på høyring skal den tilbake til endeleg politisk behandling. Tidlegast vil vedtak skje i juni, men mest truleg rett etter sommaren.