Trur på full drift i skisenteret i romjula
Til helga er familieheisen open. Skisenter-leiinga håper på snarleg oppstart av dei større heisane.
Sauda Skisenter nærmar seg nok snø til at dei kan kjøre i gang den første store skiheisen. Foreløpig er det familieskiheisen som skal driftast til helga, og som var i drift sist helg.
– Dersom me får 20-30 centimeter med nysnø til, så kan me opne den store heisen. Riktig nok må me rigge og sikre løypene først, men det kan me klare raskt. Kanskje kan me opne den store heisen i løpet av helga, men det tør eg ikkje love nå, opplyser dagleg leiar Lars Reidar Fosstveit til Ryfylke klokka 13 torsdag.
Annonse
Delvis kunstsnø-produksjon
Sauda Skisenter har fått produsert ein del kunstsnø i starten av desember. I tillegg har dei fått nær 40 centimeter natursnø den siste veka.
– Natursnøen er veldig lett så me treng litt meir. Men det er meldt meir snø dei neste par dagane, seier Fosstveit.
Denne veka har straumprisane vore svært høge. Sauda Skisenter har derfor stoppa kunstsnøproduksjonen inntil straumprisane går litt ned igjen.
Annonse
– Nå kostar det oss 60 000 – 70 000 kroner døgnet å produsere kunstsnø. Det går ikkje. Men det er rart å sitte heime med kaldt og stabilt vêr utan at me får produsert kunstsnø, seier Fosstveit.
Optimist med tanke på romjula
Når han summerer opp mengden kunstsnø og natursnø som er i anlegget nå, og kva vêr det er meldt fram til julehelga, er Fosstveit optimistisk til at Sauda Skisenter kan tilby full drift i romjula.
– Det hadde vore veldig kjekt å få til. Eg er optimistisk. Sjølv om det skal kome ein god del regn i neste veke, er det ikkje meldt mange dagar med mildvêr før meteorologane varslar kuldegradar igjen. Eg har derfor tru på romjulsdrift, seier Fosstveit.
Han opplyser at Sauda Skisenter har gjennomført energikartlegging og at han meiner at dei etter kvart vil få statleg straumstøtte. I tillegg er han glad for at kommunestyret vedtok ti millionar kroner i støtte til lokalt næringsliv, sjølv om han ikkje veit korleis denne støtten vil slå ut for Sauda Skisenter.
– Men eg håpar at slik kommunens støtte kjem på plass raskt. Det er litt usikkert og bingo nå med dei høge straumprisane. Det er viktig at me får ein oversikt over kva støtte me kan rekne med når me skal planlegge drifta framover, seier Lars Reidar Fosstveit.
