Tydeleg auke av unge kvinner som snusar

– Det er klart fleire unge menn som snusar enn unge kvinner, men det siste året viser tala ein relativt tydeleg oppgang i andelen unge kvinner som snusar, seier rådgivar i Statistisk sentralbyrå (SSB), Sindre Mikael Haugen.

Blant kvinner i alderen mellom 16 og 24 år auka andelen som snusar dagleg frå 12 prosent i 2021 til 16 prosent i 2022, viser tala frå SSB.

I gruppa av kvinner mellom 25 og 34 var det ein auke frå 17 til 22 prosent i same periode.

Å snuse fast er langt meir vanleg blant dei yngre enn dei eldre. I aldersgruppa 25 til 34 år var det 27 prosent, eller ein av fire, som brukte snus dagleg i 2022. Det er ei dobling sidan 2012.

Trass i auken blant unge kvinner er andelen som snusar i befolkninga samla stabil på 15 prosent.

Det er nokre fleire kvinner enn menn som røykjer dagleg. Andelen kvinnelege daglegrøykjarar er no 8 prosent, medan 7 prosent av mennene røykjer, viser SSB-tala.

Vel ein av tre, 36 prosent, oppgir at dei drikk alkohol kvar veke. Dette gjeld 42 prosent av mennene og 29 prosent av kvinnene. 5 prosent av dei spurde seier dei har brukt cannabis siste 12 månader

(NPK)