Uendra straumpris i andre kvartal

Prisen hushalda måtte betale, inkludert avgifter, nettleige og straumstøtte, var på 143,5 øre/kWh i andre kvartal, viser nye tal frå Statistisk sentralbyrå (SSB). Dette er marginalt ned frå 143,8 øre/kWh i første kvartal, men eit godt stykke unna toppane i fjerde kvartal 2021 og 2022, då prisen var på høvesvis 164,8 og 162,2 øre/kWh, ifølgje byrået.

– Etter ein periode med veldig låge straumprisar i 2020 auka prisen kraftig i både 2021 og særleg 2022. I første kvartal i 2023 sokk straumprisen for hushald med 11 prosent, men no har altså prisutviklinga flata ut, seier rådgivar Ståle Skrede.

Prisen for andre kvartal vart dermed 30,7 prosent høgare enn gjennomsnittleg pris for andre kvartal for dei siste fem åra.

– Det er viktig å påpeike at prisane som her blir oppgitte er gjennomsnitt for heile landet. Det var store prisvariasjonar mellom prisområde i Noreg, og særleg mellom Sør- og Nord-Noreg. Prisane i andre kvartal var høgare i dei tre sørlegaste prisområda enn i prisområda i Midt- og Nord-Noreg, seier Skrede.