Veka som gjekk (utanfor Sandeid)

Eitt eksempel er når dei ringer frå bilverkstaden og informerer om status på firhjulingen som står på bukk. ”Vi ser at det er litt slark i omfordelingsboltane. Vi er nok nøydd til å skifte både dei og slurehjula som er nedslitt. Eg reknar med du vil ha det ordna?”

Det er jo klart eg vil ha det ordna. Ingen vil vel køyre rundt med slark i omfordelingsboltar og sletne slurehjul? Det kan umulig vere trygt.

Ein er heller ikkje gniten når elektrikaren finn feil på det elektriske anlegget i huset. Med hovudet inni sikringsskåpet og eit måleinstrument som piper alarmerande, sukkar han oppgitt ”Ai, ai, ai. Her har det blitt gjort litt hastverksarbeid ja.” Han peiker gjerne på nokre ledningar, og tar det for gitt at eg forstår at dette ser feil ut. Det gjer eg ikkje, men dette handlar jo om tryggleik i heimen. Best å få det ordna.

Hos legen er det som regel to mulege utfall. Nokre gonger får ein tilbakemeldingar ein ikkje forstår. ”Du har visst litt låge verdiar av krom i tullus pratis, strekk i tarmveggen og dobbeltsidig skivebrems på baknerva. Her tenker eg at vi køyrer på med Biroflexioditrin og Snablodin ein periode, så tar vi ein ny sjekk om fire veker.” Jepp, det verkar fornuftig. Det andre utfallet, som utgjer omlag 85 prosent av tilfella, er å vente og sjå om det går over av seg sjølv.

Det skjer mykje spennande ute i verda, og her er eit par smakebitar frå veka som gjekk.

* Fredag for ei knapp veke sidan gav statsministeren og helseministeren etter alt å døme sin siste pressekonferanse om koronaviruset. Beskjeden om at Norge skulle opnast laurdag klokka 16.00 gleda heile landet, og då det talrike pressekorpset slapp til med sine spørsmål, tenkte eg at mange viktige spørsmål skulle bli bevart. Er det forventa oppblomstring av nye virus og sjukdomar? Har regjeringa ein plan for ny beredskap ved liknande hendingar i framtida? Vil delar av næringslivet få vidare hjelp etter økonomiske tap i koronatida? Eg fekk ikkje svar på noko av dette, men det viktigaste spørsmålet av alle blei heldigvis både grundig og detaljert besvart. Det er lov å danse.

* Avisa Valdres er i stor grad upløgd mark for meg, men det er lett å la seg begeistre over lokalavisa midt i landet. Eg forstår imidlertid at det er langt mellom dei heilt store hendingane, når avisa serverer overskrifter som ”Karsten (32) starta dagen med en dukkert”, ”Karene i Veidekke frakter 30 lass med asfalt til dette strekket hver dag”, eller min favoritt ”Da jeg hørte om dette prosjektet, tenkte jeg: Åh nei, ikke enda et prosjekt”. Nei, det kan jo fort bli litt mykje.

* NRK fortel denne veka om den svartaste malinga som nokon gong er produsert, kalla ”Musou Black”. For å demonstrere kor svart malinga er, har dei vist eit bilde av fem roser i forskjellige fargar, den eine i Musou Black. Dei er vist mot ein svart bakgrunn, og resultatet er spektakulært. Mot svart bakgrunn er den svarte rosa nesten umuleg å sjå. Kven skulle trudd det? NRK tar lesarane vidare inn i vitskapens verden, og viser eit nytt bilde av dei same rosene, denne gangen mot ein kvit bakgrunn, og om du ikkje gjetta det, så var den svarte rosa plutseleg heilt tydeleg å sjå.

* I samband med gjenopninga laurdag, rapporterte dei fleste landsdekkande media frå den store festkvelden ved alle pubar, restaurantar og nattklubbar i landet. Ivrige og festglade nordmenn brøyta seg veg i enorme køar for å få sleppe inn på dansegolv og barkrakkar. Mange rista på hovudet, men å stå samanklemt i svære klynger, snuble, henge over kvarandre og snøvle blei som kjend ufarleg laurdag klokka fire, så eg synest det blir urettferdig å kalle disse menneska for uforsiktige, enkle sjeler utan så mykje som éin tanke som strekk seg lenger enn eigen nasetipp. Vi må jo vise litt storsinn.