Veka som gjekk (utanfor Sandeid)

Eg har fire eller fem kassar med cd-plater, tilsvarande mange kassar med dvd-ar, reiseseng for babyar, oppblåsbar dobbeltseng, 20-30 barnebøker frå tidleg på 80-talet, ein rull med stoff til å trekke båtputer, cirka 90 centimeter med svart benkeplate til eit kjøkken eg ikkje lenger eig, 10-12 afrikanske tremaskar og ein rusta sparkstøtting som eg ein gong hadde planar om å restaurere. Bare for å nemne noko.

Kva seier du? Du vil gjerne vite kva fargar eg hadde på veggane då eg budde for meg sjølv for 20 år sidan? Ikkje noko problem. Eg har prospekta frå alle dei tre tidlegare bustadane eg har eigd. Dei ligg i ei svær skuff, saman med straumladar til både ein Motorola C113 og ein Nokia 3110, røykvarslarbatteri, fire hamrar, ei eske med russekort og ein liten pose med skruar og småspiker. Greitt å ha liggande klart.

Det er lite sannsynleg, men slett ikkje utenkeleg at ein velger å droppe fiber og trådlaust internett, og heller gå tilbake til ISDN og internett på telefonlinja. Eg har både lang og kort leidning klar. Finn du ikkje straumleidninga til din Philips Avent babycall, seier du? Fortvil ikkje. Eg kan hjelpe.

Eg er takknemlig overfor min betre halvdel, som også ser det som naturleg å ta vare på slike fullt brukande ting. No er det rett nok muleg at ho bevisst ikkje seier noko, i frykt for at eg skal stille ultimatum som gjer at ho sjølv må kvitte seg med sine omlag 300 gåveesker i papp, serviettsamlinga eller nokre av dei 50 isboksane som er vaska og stabla etter storleik i ei kjøkkenskuff. Nei, eg trur vi forstår kvarandre. Om vi no først skal ha 300 bursdagsgjestar, så vil dei jo sjølvsagt trenge serviettar. Og tenk på all maten som blir til overs!

Her er eit par nyheiter frå veka som gjekk:

* VG er flinke til å hjelpe lesarane sine til å halde seg på den rette sti, med artiklar som ”Grepene som gjør deg attraktiv”, ”Så ofte bør du male huset” og ”Disse festantrekkene kan du kaste nå”. VG kjenner openbart sine lesarar svært godt, når dei kan gi så konkrete råd til kvar og ein av oss. Mange av artiklane handlar om kor mykje eller lite som skal til før du hamnar i økonomisk ruin, men det å grave seg ned i gjeld er visst ikkje så farlig som eg trudde. Denne veka la nemleg VG ut artikkelen ”Tipsene for å få mer lån enn fem ganger inntekten”.

* Drama i Sandefjord denne veka! Ein innbyggar reagerer kraftig, etter at fleire klasar med grøne ballongar er hengt opp i sentrum. Sandefjord Blad er på saka, og har blant anna lagt ut ein bildeserie der ein kan sjå ballongklasane både før, imens og etter at ballongane sprekk. Ein kan si kva ein vil, men dette gjer inntrykk.

* Kim Kardashian er kjend for å vere kjend, og då ho blei gift for tredje gong, denne gong med Kanye West, blei ho endå meir kjend. No er dei to skilde, og det er sjølvsagt store forventningar og nysgjerrigheit knytt til kven Kardashian skal gifte seg med neste gong. No for tida er ho visstnok kjærast med Pete Davidson, ein kar eg aldri har høyrt om. Han blir kanskje kjend no som han er saman med Kim Kardashian? Kjekt og spennande er det i alle tilfelle.

* Den aldrande musikaren Neil Young trakk nyleg all sin musikk bort frå straumetenesta Spotify, i samband med ei konflikt om podcasten til Joe Rogan, som Young meiner spreier feilinformasjon om koronavaksiner. Også artist Joni Mitchell har sett hardt mot hardt og sagt at dersom Spotify ikkje fjernar Rogans podcast, vil også ho ta bort all sin musikk frå tenesta. Her heime i Norge har artisten Egil Hegerberg, mest kjend som ”Bare Egil”, også tatt samfunnsansvar og stilt følgande ultimatum: ”Hvis ikke Spotify oppfyller alle krav, kommer jeg til å legge ut mer musikk der.”

* Troms er rysta av ein tjuveribølge, skriv avisa Fremover. Overskrifta er ”Hvem i all verden er det som tar med seg brukte dokoster?” Tja, det er kanskje nokon som har følgt VG sine tips om privatøkonomi?