– Vi vil at dette skal vere starten på eit langvarig klimasamarbeid i Sauda
Iverson e-Fuels startar opp grøn kafé, og håpar det er starten på mange konstruktive diskusjonar rundt temaet klima i Sauda.
– I første omgang er det prosjektet ammoniakkfabrikk, planane våre og korleis det vil påverke Sauda på ulike vis som er temaet, og vi håpar det kjem mange spørsmål og innspel, seier Gunnar André Gauthun, hub-koordinator i Iverson e-Fuels, som er verdas største grøne ammoniakkfabrikk under planlegging, på Birkeland.
Gauthun opplyser at den grøne kaféen, som selskapet har valt å kalle arrangementet, har vore under planlegging ei tid. Målet, slik han skildrar det, er å skape dialog. Ikkje bare mellom selskapet og innbyggarar i Sauda, men også på tvers av bransjar innan næringsliv, kommune, innbyggarar og studentar.
Annonse
– Denne gongen blir kaféen i Storesalen på Folkets Hus, så det vil vere plass til alle som har lyst å vere med. Det blir runde bord, låg terskel for prat og mingling, og meininga er at dette skal vere ein plass der ein kan få svar på ting ein lurer på, samt å ta diskusjonar og gi tilbakemeldingar til oss, seier han.
– Starten
Grøn kafé er namnet Iverson e-Fuels har valt å bruke på arrangementet, som dei har planar om å gjenta med jamne mellomrom framover. Idéen er at konseptet skal vere eit forum der også andre aktørar i næringslivet kan ta over som ”kafévertar”, og ta med nye tema og samtalar innan industri, klima og lokalsamfunnet Sauda.
– Dette er heilt klart eit ledd i vårt løfte om å vere transparente og tilgjengelege som selskap. Ammoniakkfabrikken vil bli ein arbeidsplass for mange, og vi vil at det skal vere mykje kunnskap der ute om kva vi jobbar med, ikkje minst blant dei som er skuleelevar og studentar og kanskje vil spisse sine utdanningar mot industrien, seier Gauthun.
Annonse
Dei som har bekymringar, spørsmål eller kritikk til ammoniakkfabrikken, er også hjarteleg velkomne, understrekar han.
– Både eg, Torfinn Opheim og selskapets leiar Hege Økland vil vere med på kaféen, og vi ønsker alle spørsmål og innspel velkomne. Meininga er at dette skal vere starten på eit langvarig klimasamarbeid som samlar Sauda både rundt vår grøne ammoniakkfabrikk og andre spennande grøne prosjekt og idéar, avsluttar Gauthun.
