Nytt frå lag og foreiningar
Sogelagskonsert heidrar Arthur Svendsbråten
Tysdag er det igjen sogelagsmøte i Folkets Hus. Men denne gongen blir det ikkje med dekte bord og sogelagsmat.
Det blir konsert – sogelagskonsert. I programfoldaren vår heiter det «Poeten Arthur i ord og tonar, presentert av Sigmund Andersen og Oskar Waage-Pettersen.» Og dei to har fått med seg eit elitelag av lokale musikarar. Saman byr dei på konsert i Storesal.
Arthur Svendsbråten var ein krumtapp i Sauda revy- og teaterlag i over tretti år, frå den spede starten i 1982. Her samarbeidde han med den innleigde regissøren Bjørn Sæter, med kompisen Leiv Arild Berg og med alle dei andre revyeldsjelene i Sauda. Og så skreiv han revytekstar som andre, i hovudsak Oskar, sette tonar til.
Annonse
– Arthur var poet og han skreiv med scenebiletet og den dramatiske effekten for auga, seier Sigmund.
Arthur døydde i 2017. Sigmund var kollega, ven og «revyundersått». Difor vil sogelagskonserten vere Sigmund og Oskar sin måte å heidre minnet etter Arthur.
Etter konserten blir det tid for ein liten drøs mellom stolradene, før skriftstyraren slepp til og presenterer det 45. årsskriftet frå sogelaget. Dei som ønsker det, kan også få kjøpe skriftet før dei går heim i novemberkvelden. Billettar får de kjøpt på saudakultur.no og på biblioteket.
Ver velkomne til sogelagskonsert i Folkets Hus.
