– Stor interesse for datasenter

Sogelaget åpna møtet utradisjonelt med bursdagssong for Jorunn Solli, som tysdag runda 80 år. Ho er fast medlem av den viktige komiteen som alltid sørger for sogelagsmat.

120 tilhøyrarar var på plass i Folkets Hus for å få informasjon om planane for datasenteret i Hellandsbygd, og hedlingane var sjølvsagt svært godt representert. Lokasjonsleiar i TeraKraft, Asbjørn Birkeland, hadde på relativt kort frist sagt ja til å fortelja oss om det nye datasenteret i Hellandsbygd etter at kraftstasjonen blei lagt ned i 2009.

Ordføraren vår frå 2015 til 2023 hadde delt føredraget i tre delar og brukte den første halvtimen på Stasjon 1 si historie frå starten i 1913 til avslutninga nær hundre år seinare. Som styreleiar i Sauda Lokalarkiv hadde Birkeland sikra seg gode bilde frå utbygginga av Storlidammen, Dalvatn, Førstevatn, Svartevatn og Holmavatn. Me fekk førsteklasses bilde av den bratte taubanen opp til Dalvatn og herlege vinterbilde av 20-30 hestar som stod for tungtransport av røyr og anna materiell.

– Det flottaste og mest imponerande var alle hestane i arbeid, var Johannes Brekke (92) sin kommentar på veg ut døra på Folkets Hus.

Mange utfordringar i oppstarten

Utbygginga gjekk ikkje etter planen, og her var ulykker, dødsfall og store svingningar i mannskapsstyrken. Storflaum i 1921, snøras, streiker, influensa og spanskesjuka førte også til utfordringar i tillegg til budsjettsprekk på nærare 100 prosent. Første verdskrig resulterte også i kansellering av viktige leveringar frå tyske Siemens.

Den første straumleveransen kom 20. oktober 1919, og i mars året etter var det ordinær drift med kraftleveranse også til Haugesund og Karmøy.

Ein kraftstasjon treng kontinuerleg vedlikehald, og fornying av tak, verkstad og lagerbygg blei utført på 50-talet, og litt seinare kom overgangen frå 25 til 50 periodar.

Kva skal bygget brukast til?

Den nye kraftstasjonen inni fjellet i Søndenåhavn overtok etter kvart funksjonen for stasjon 1, og kva kunne så ein gammal, sliten kraftstasjon nyttast til? Dataindustrien kom raskt på banen og lista opp Saudas fortrinn: Kaldt klima, nok kraft og 100 år med prosessindustri.

Hedlingane fekk etter kvart fiber, men kryptovaluta hadde dårleg klang i Sauda og blei omtala som «tullindustri.» New Kaupang kom inn for å hjelpa, men snart var også sveitsiske Xbit på veg ut fjorden.

I oktober 2021 blei det meir alvor då TeraKraft og italienske Giorgio Sbriglia kom på banen, men det velkjende prishoppet på straum i 2022 heldt på å velta planane. Støyproblemet er nå løyst ved vasskjøling, men når ord som «brasiliansk såpeopera» blir brukt i debatten, kan det vel tyda på at fleire skeptiske pessimistar neppe har akseptert planane.

Kva er eit datasenter?

Det kan vera nyttig å sjå på Asbjørn sin definisjon av datasenter:

Eit datasenter er ein bygning som husar datamaskinar, kalla serverar, som lagrar informasjon og kjører digitale tenestar.

A1 brukar desse serverane til å trena modellar og produsera svar. Bygningen leverer elektrisitet, kjøling, tilkobling og beskyttelse.

Datamaskinar omdannar elektrisk energi til varme. Kjøling fjernar denne varmen slik at utstyret framleis kan fungera.

Bygningen og dei støttande systema har eit miljøavtrykk i tillegg til datamaskinane.

Verdas første væskeavkjølte datasenter i Hellandsbygd har gitt bygget nytt liv. Både fasaden og «møbleringa innandørs» er kreativ og moderne, men har også med respekt for historia tatt vare på «historiske detaljar.» Prosjektet har berre tatt ni månader, og 80 mann frå 25 lokale bedrifter har vore i sving og samstundes fått eit kompetanseløft.

Datasenteret vil i første omgang gi 10 megawatt og ha 30 tilsette innan ulike yrkesgrupper, eit viktig tilskot for regionen.

– Nå er det siste finish før full drift, avslutta Asbjørn Birkeland, som imponerte salen med stoisk ro og digital kompetanse.

Hans omfattande dokumentasjon ved hjelp av avisa Ryfylke viser også tydeleg verdien av vår lokale hundreåring.

Møtet var ikkje berre av interesse for datasenteret i Hellandsbygd, men var også relevant for den pågåande debatten om datasenter på Birkeland.

Sauda sogelag v/Kåre Rød