Mental helse: Viktig bidrag til Sauda

Om ei veke markerer lokallaget Mental Helse Sauda på nytt Verdensdagen for psykisk helse. Temaet i år er sjølvmord. Det er kunstnaren Maud Angelica Behn og føredragshaldar Kim Daniel Jonasson som er invitert til Sauda for å snakke om sjølvmord, eit tema dei begge har nær erfaring med, men på svært ulike måtar.

Psykisk helse er eit viktig tema i samfunnet , men det har vore eit tabubelagt tema som har fått altfor lite fokus. Mange menneske vil oppleve periodar av livet der dei vil slite psykisk, og det blir rapportert om at psykiske vansker blant unge er ei utfordring samfunnet skal ta på alvor.

Mental Helse Sauda har vore ein viktig aktør i saudasamfunnet som har løfta fram temaet psykisk helse. For 27 år sidan starta dei opp Møteplassen og etablerte på den måten ein arena for psykisk helse der folk kan møtast. I dag er Mental Helse Sauda blant dei største lokallaga i landet. Innsatsen dei gjer er fantastisk.

Det lokallaget skal ha ekstra honnør for, er at dei har utfordra den mannlege delen av lokalsamfunnet til å prate meir om psykisk helse. For det er blant menn det er mest tabubelagt å snakke om korleis ein har det. Det er også menn som er overrepresentert i statistikken når det gjeld sjølvmord.

Å støtte opp om Verdensdagen for psykisk helse er ein fin måte å anerkjenne innsatsen Mental Helse Sauda gjer. Men i tillegg er det ein fin måte å utfordre seg sjølv på å delta på eit arrangement i regi av Mental Helse Sauda. Kanskje kan det vere med på å gjere terskelen litt lågare den dagen du har behov for å prate med nokon. Dette gjeld også for pårørande.

Møteplassen har som mål å vere eit trygt og godt lågterskeltilbod. Her møtast folk i alle aldrar, og med ulik bakgrunn. Det er ein uforpliktande arena. Der kan ein også møte opp i eigne pensjonistgrupper, ungdomsgrupper, grupper for menn og det er tilbod for eigne turgrupper.

Sauda kommune har gjennom mange år valt å støtte Mental Helse Sauda. Det er noko Sauda kommune også bør ta med seg inn i denne budsjettprosessen.

Førebygging er god samfunnsøkonomi. Spesielt når lokallaget Mental Helse Sauda er basert på frivillig innsats frå dyktige eldsjeler.