Ryfylkes leiar: – Må ta rekruttering på alvor i Sauda

Tysdag 14. oktober blir det gjennomført ei rekrutteringssamling i Folkets Hus. Næringslivet i Sauda er invitert til samlinga. Målet med samlinga er å rette søkelyset på korleis Sauda skal klare å rekruttere arbeidskraft og kompetanse i framtida. For rekruttering av kompetanse er alt ei utfordring i Sauda i dag. Prognosen er at denne utfordringa blir større i framtida.

Rekruttering av arbeidskraft er ikkje bare ei utfordring for ein næringslivsleiar eller personalsjef. Det er også ei utfordring for dei tilsette. Mangel på arbeidskraft og kompetanse går ut over arbeidskvardagen til dei tilsette. I tillegg kan denne mangelen truge økonomien og eksistensen til bedrifta.

Men mangel på kompetanse kan også truge kva tenester innbyggarane i Sauda har tilgjengeleg. Mangel på legar og sjukepleiarar går ut over innbyggarane i Sauda. Mangel på lærarar går ut over elevane. Mangel på saksbehandlarar i Sauda kommune går ut over nødvendige gjøremål i lokalsamfunnet. Slik kan ein fortsette i det uendelege. Arbeidskraft og kompetanse er ein kritisk viktig faktor i lokalsamfunnet. Derfor er det viktig at saudasamfunnet tar denne utfordringa på alvor. Flest muleg bedrifter, saman med offentleg sektor, bør vere til stades når Arena Sauda: Rekruttering og kompetanse» blir gjennomført på Folkets Hus 14. oktober.

Bak dette initiativet står ei ressursgruppe som består av representantar frå Sauda kommune, Rogaland fylkeskommune, Sauda vidaregåande skule, Sauda Vekst, Sauda Næringsutvikling KF, Eramet, Statkraft og Saudefaldene.

All ære til initiativtakarane som set dette på dagsorden. Det er eit sterkt lag. Lokalsamfunnet må samarbeide om rekrutteringsutfordringa. For saudasamfunnet er ikkje aleine om denne problemstillinga. Andre kommunar har den same utfordringa. Sauda konkurrerer derfor om den same kompetansen med andre kommunar. Da er det viktig å vinne fram i denne konkurransen.

Kan bedrifter samarbeide om rekruttering og spele på lag, i staden for å konkurrere internt mot kvarandre i Sauda? Kan bedrifter inngå samarbeid om tilsette og dele på kompetansen dersom dette blir eit nødvendig gode? Kan bedrifter hjelpe til med å skaffe jobb til ein sambuar, dersom ein person vurderer å takke ja til ein jobb og flytte familien til Sauda? Kan bedrifter gå saman om å marknadsføre Sauda?

Spørsmåla er mange. Det er også mulegheitene. Da er det viktig å ha ein arena der dette arbeidet kan bli løfta fram.