– Sævdas» framtid – hugs kven fabrikken blir vedtatt for!

Det er mykje som er bra i Sauda. Frå tennisbaner til toppturar, eit nært fellesskap og ein trygg kvardag. Det gir mykje verdi i livet, men det betalar ikkje ned bustadlån eller studielån. Folk treng jobbar å leva av. Me er i 20-åra. Vår generasjon skal bæra samfunnet vidare, og leva lengst med konsekvensane av vala som blir tekne no, og på måndag i kommunestyret.

Endring kjem aldri når det passar, men å tru at framtida kan byggjast utan endring, er å lura seg sjølv.

Noreg har sett seg mål om store utsleppskutt dei neste tiåra, men me er knapt i gang. Det trengst handling, ikkje fleire målsettingar. Klimaet er i endring, også i Sauda. Med ny fabrikk i Sauda vil me kunne gi eit stort bidrag til ein omstilling som kjem. Kanskje det også gjer noko med storsamfunnets vilje til å satsa i lokalsamfunn med så store bidrag.

Industriprosjektet kommunestyret skal ta stilling til er ei moglegheit som kombinerer både utsleppskutt, lokal aktivitet, store investeringar, og nye arbeidsplassar. Ja, ein god del straum er alt tildelt. Likevel er det merkeleg at lokalsamfunn som produserer straumen sjølv, skal nøla med å bruka han. Det burde vel ikkje vere eit problem å bruka kortreist kraft?

Me forstår godt at mange kjennar på ei uro. Det er store inngrep, og er som det meste som er nytt; ei endring. Me tryggast iallfall av at Noreg har strenge føringar for industri. For eit smelteverk anno 1920-tallet som ein ammoniakkfabrikk anno 2020-tallet.

Dessverre verkar det som fleire vil diskutera sjølve debatten til verda er ferdigdebattert. Det har me ikkje tid til. Sjølv ex.phil-pensum har ein fått repetert. Mykje det siste året har minna om eit behov for å rette på komma i ei naudmelding. Klokka tikkar, og me treng handling, meir enn teori og endelause konspiratoriske kommentarfelt.

Spørsmålet må vera, kva rolle skal Sauda ha? Kva må til for å lukkast? Me har iallfall kraft, kompetanse og kultur for døgndrift. Samtidig har me sidan dei glade 60-åra hatt eit dalande folketal og tenestetilbod. Sjukehuset er for vår del berre historieforteljing. Kva om me endar opp med ei tilsvarande historieforteljing om hurtigbåten ein gong? Eller for det som ein gong var Sauda vidaregåande skule? Dagens tilbod er ikkje rissa fast på ei av steintrappene på veg til Hovlandsnuten. Avvikling er noko som må forebyggast.

Til kommunestyret:

Endring passar aldri. Det er lett å bli blenda av ein kort horisont. Men kva er visjonen utover neste månad? Kva skal Sauda vera i 2030 – i 2050? Val som blir tekne i dag formar framtida, og då må framtidstanken og vera med i vurderinga. Hugs på dei dykk tar val på vegne av.

Hugs det på måndag. Lukke til!

Med vennleg, og håpefull helsing, i fornamnsrekkefølge: August Iversen, Birthe Aaker, Eivind Hustveit, Frikk Bratås, Hedda Valskår, Isabell Ramsnes, Iselin Å. Wiik, Joar Fiveland, Kristin Amdal, Linnea Haraldsen, Magnus Tveit, Maja J. Jordal, Mandius Teig, Martynas Maldzius, Mathias Bergsbakk, Mats D. Jordal, Mats Nordvik, Phillip Johansen, Sanne Å. Hansen, Sebastian Listøl, Sverre Eikevik, Tobias A. Årthun, Toralf Rusten, Torjus H. Øye, Tuva Rosnes.