Lesarinnlegg
– Saman for Rogaland
Ein hard valkamp er over, og veljarane har sagt sitt. No er me 14 representantar frå Rogaland (Rogalandsbenken) som skal vera på Stortinget og kjempa for å få gjennom mest mogleg av partiprogramma me gjekk til val på.
Samstundes som me representerer ulike parti, representerer me òg Rogaland. Det betyr at eg har eit ansvar både for dei i Rogaland som røysta på Sp, og for dei som ikkje gjorde det.
Eg har eit ynskje om at me skal snakka godt saman på Rogalandsbenken. Me må ha god dialog med bedrifter, organisasjonar og kommunar i Rogaland, og me må gjera prioriteringar.
Annonse
Me veit at mykje makt og kapital ligg i Oslo. Samstundes veit me kvar verdiane vert skapte. Rogaland må difor få sin rettvise del av politiske gjennomslag. Det ansvaret ligg på Rogalandsbenken.
Dette betyr ikkje at me skal vera samde om alt. Det betyr heller ikkje at den politiske diskusjonen vil stogga. Hard debatt og godt samarbeid er ikkje motsetnader – det er tvert imot eit godt grunnlag for felles gjennomslag.
Eg vil ha ein rogalandsbenk der politikk og saker som gjeld Rogaland vert diskuterte på ein tillitsfull måte. Me kan finna saman om konkrete prosjekt og politiske løysingar som er viktige for Rogaland.
