Produksjonen av vasskraft steig i førre veke, men er framleis lågare enn gjennomsnittet dei siste ti åra på denne tida av året. Samtidig var Noreg nettoeksportør etter seks veker på rad som nettoimportør.
Erik Johansen / NTB/ NPK
Auka vasskraftproduksjon førre veke
Produksjonen auka med 17 prosent samla for heile Noreg, og mest i Sørvest-Noreg og Vest-Noreg med høvesvis 32 og 30 prosent.
Forbruket i Noreg gjekk opp førre veke, men ikkje så mykje som produksjonen. Kraftproduksjonsstatistikken viser nemleg at Noreg var nettoeksportør av kraft i veke 41, etter seks veker på rad som nettoimportør, melder NVE.
Bakgrunnen for at Noreg vart nettoeksportør førre veke, var lågare vindkraftproduksjon i både Norden og Tyskland, og redusert overføringskapasitet mellom Sverige og kontinentet på grunn av planlagt vedlikehaldsarbeid.
I alle dei tre prisområda i Sør-Noreg auka kraftprisen førre veke, og vekeprisen enda på rundt 175 øre per kilowattime.
I Midt-Noreg og Nord-Noreg gjekk prisane ned, og desse områda hadde ein vekepris på litt over 15 øre/kWh.
Også på kontinentet gjekk prisane opp, medan i Sør-Sverige heldt dei seg på same nivå.
(NPK)
