Du må handle no om du vil unngå bråkete måker denne sommaren

– Våren og sommaren er ei sårbar tid for dei truga måkene over heile landet, og det er viktig at måkene får høve til å hekke i fred i denne perioden. Vi må lære oss å leve med naturen tett på, også i byane, seier Ellen Hambro, direktør i Miljødirektoratet, i ei pressemelding.

Måker vender oftast tilbake til same hekkeplass over fleire år. Hadde du problem med måker i fjor, kan du gjere førebyggjande tiltak for å få dei til å finne ein annan stad no. Dette må gjerast i god tid, fordi måkene skal få hekke i fred når reirbygginga er i gang, og då er det forbode å fjerne eller forstyrre reir.

Før måkene byggjer reir, kan du gjere førebyggjande tiltak:

*Spenne opp trådar på typiske sitteplassar, på gesimsar og takutstikk der fuglane ofte sit for å observere og følgje med.

*Spenne trådar opp på taket med 30 centimeter mellomrom og 30 centimeter opp frå taket før hekking, men ikkje bruk nett som fuglane kan sette seg fast i.

*Variere med ulike typar fugleskremmarar før hekking.

*Kommunen kan legge til rette for hekking andre stader ved å bygge måkeplattformer som blir sette opp på eigna stadar.

(NPK)