Ein av tre nynorskstudentar har fått negative tilbakemeldingar

I ei spørjeundersøking utført av Norstat på oppdrag for Nynorskhuset i Førde og fleire nynorske organisasjonar, seier to tredelar av nynorskbrukarane at dei er stolte over å bruka nynorsk. Men det kjem også fram at over 16 prosent har fått negative tilbakemeldingar for nynorskbruken sin det siste året.

Til saman har over 5200 personar svara på den nettbaserte undersøkinga, skriv Nynorsk Mediesenter i ei pressemelding. 19 prosent svarar at dei oftast skriv dialekt i private meldingar og sosiale medium, og fire prosent svarar at dei skriv nynorsk. 73 prosent skriv oftast bokmål, og to prosent engelsk.

56 prosent av nynorskbrukarane svarar at dei føler at det er akseptert å skriva nynorsk i lokalsamfunnet sitt. Minst akseptert synest det å vera i Nord-Noreg og Oslo. Færre unge enn eldre kjenner at det er akseptert å skriva nynorsk, og éin av fire unge nynorskbrukarar mellom 15 og 29 år har opplevd å få negative tilbakemeldingar for å skriva nynorsk det siste året. Av dei 31 nynorskskrivande studentane som svara på undersøkinga, har meir enn éin av tre fått negative tilbakemeldingar det siste året fordi dei skriv nynorsk.

– Det er alvorleg at så pass mange opplever å få negative tilbakemeldingar på det norske skriftspråket sitt. Tala for dei unge er små, og derfor usikre, men viss det verkeleg er slik at ein så stor del nynorskskrivande unge og studentar opplever å få negative tilbakemeldingar på å skriva nynorsk, så er det eit svært alvorleg, seier Svein Olav B. Langåker, som er dagleg leiar i Landssamanslutninga av nynorskkommunar og også har vore prosjektleiar for undersøkinga.

Fleire av dei som hadde nynorsk på barneskulen skiftar til bokmål i løpet av livet. Av dei som hadde nynorsk på barneskulen, men no oftast bruker bokmål i private meldingar og sosiale medium, er det nesten ni av ti som òg bruker bokmål på jobb. Under 40 prosent av desse føler det er heilt akseptert å bruka nynorsk på jobb. 40 prosent kjenner det er akseptert i lokalsamfunnet. 55 prosent av desse står fritt til å velja kva skriftspråk dei vil bruka i jobbsamanheng.

Undersøkinga er betalt av Nynorsk kultursentrum, Noregs Mållag og Nynorskhuset (med støtte Vestland fylkeskommune) og gjennomført av Norstat i samarbeid med NRK Analyse, NRK Nynorsk Mediesenter og Landssamanslutninga av nynorskkommunar (LNK).